باس پروكۋراتۋرا قىتايدا ٶمٸر بويى باس بوستاندىعىنان ايىرىلعان اقجارقىن تۇرلىبايدى ەلگە قايتارۋ ٷشٸن نە ٸستەۋ كەرەكتٸگٸن تٷسٸندٸردٸ, دەپ حابارلايدى Sputnik قازاقستان.
باس پروكۋروردىڭ ورىنباسارى مارات احمەتجانوۆتىڭ ايتۋىنشا, پروكۋراتۋرا ورگاندارى ٷكٸمنٸڭ زاڭدى كٷشٸنە ەنگەنٸن كٷتەدٸ. ودان كەيٸن اقجارقىن تۇرلىبايدى جازانى ٶز ەلٸندە ٶتەۋ ٷشٸن قايتارۋ شارالارىنا كٸرٸسۋگە بولادى. الايدا وعان تۇرلىبايدىڭ ٶز كەلٸسٸمٸ كەرەك.
"قازاقستان مەن قىتايدىڭ اراسىندا تيٸستٸ كەلٸسٸمشارت بار. سول شارت بويىنشا جۇمىس ٸستەيمٸز. سوت ٷكٸمٸ شىققانىمەن زاڭدى كٷشٸنە ەنۋٸ كەرەك. سودان كەيٸن ٶكٸلەتتٸ ورگان – پروكۋراتۋرا, ياعني بٸز قالعان جازاسىن قازاقستاندا ٶتەۋگە مٷمكٸندٸك جاسايمىز. كەلٸسٸمشارتتىڭ نەگٸزٸندە سۇراۋ سالامىز. ەرينە, اقجارقىننىڭ ٶز كەلٸسٸمٸ بولۋى كەرەك. قازاقستاندا قالعان جازانى ٶتەۋگە كەلٸسٸپ, ٶتٸنٸش بەرسە, جۇمىس ٸستەيمٸز", - دەدٸ احمەتجانوۆ.
سوت ٷكٸمٸ ٶزگەرٸسسٸز قالدى
27 جەلتوقساندا قىتاي سوتى وتانداسىمىز اقجارقىن تۇرلىبايعا قاتىستى سوت شەشٸمٸن ٶزگەرٸسسٸز قالدىرعان بولاتىن.
"قىتاي سوتى ٶمٸر بويى باس بوستاندىعىنان ايىرۋ تۋرالى ٷكٸمدٸ ٶزگەرٸسسٸز قالدىردى", - دەلٸنگەن سىرتقى ٸستەر مينيسترلٸگٸنٸڭ رەسمي حابارلاماسىندا.
سوت ٷكٸمٸ 10 كٷننەن سوڭ كٷشٸنە ەنەدٸ. وتىرىسقا اقجارقىننىڭ ادۆوكاتتارى مەن قازاقستاننىڭ قىتايداعى ەلشٸلٸگٸنٸڭ كونسۋلى قاتىسقان.
اقجارقىن تۇرلىبايدىڭ تاعدىرى
قازاقستان ازاماتى اقجارقىن تۇرلىباي 2014 جىلى ناۋرىزدا گۋانچجوۋ ەۋەجايىندا ۇستالعان بولاتىن. وعان شەكارادان 4,5 كەلٸ ەسٸرتكٸنٸ الىپ ٶتپەك بولدى دەگەن ايىپ تاعىلدى. ول كەزدە وتانداسىمىز 20 جاستا بولعان ەدٸ.
2015 جىلدىڭ ماۋسىمىندا قىتاي سوتى ونى ٶمٸر بويىنا باس بوستاندىعىنان ايىردى. سوتتا اقجارقىن شەتەلدٸك دوسى الداپ كەتكەنٸن ايتىپ, كٸنەسٸن مويىنداعان جوق.
2016 جىلى سوت شەشٸمٸ جويىلىپ, ٸس قايتا قاراۋعا جٸبەرٸلدٸ.
