Qazaqstan musylmandary dini basqarmasynyń tóraǵasy, Bas múfti Naýryzbai qajy Taǵanuly 18 mamyrdan bastap meshitke keletin jamaǵatqa úndeý tastady, dep habarlaidy "Ult aqparat".
«Alla qalasa 18 mamyrda jeke qulshylyq jasap, quran oqytyp, neke qidyrýǵa niet bildirgen azamattar úshin meshitterimizdi ashamyz. Bul elimizdegi barlyq meshittiń esigi ashylady degen sóz emes. Óitkeni ár oblystaǵy karantin jaǵdaiy ártúrli. Bas sanitarlyq dárigerdiń karantin rejimin kezeńdik talaptaryn saqtaý boiynsha qaýlysyn ustanýdamyz. Sonymen qatar óńirlerdegi koronavirýs infektsiiasynyń taralýyna jol bermeý jónindegi jedel shtabtyń qaýlysyna sáikes jumys júrgizemiz. Osyǵan orai oblystaǵy meshitterimizdiń ashylýy – sol óńirlerdegi koronavirýs infektsiiasynyń taralýyna jol bermeý jónindegi jedel shtabtyń qaýlysyna sáikes júzege asyrylady», - dedi Bas múfti OKQ-da ótken baspasóz máslihatynda.
Onyń aitýynsha, karantin talaptaryn saqtaý úshin jamaǵatpen oqylatyn bes ýaqyt, juma, taraýyq namazdaryna qatysty ýaqytsha shekteýler óz kúshinde qalady.
«Jamaǵatpen oqylatyn namazdardyń merzimin aldaǵy ýaqytta qosymsha habarlaimyz. Qasietti kitabymyz Quranda «Qiyndyqpen birge jeńildik ber. Alla sizderge jeńildikti qalaidy» degen. Allaǵa shúkir, elimizde TJ rejimi aiaqtalyp, halqymyz qalypty ómirge aýysa bastady. Alaida karantin talaptaryn qatań saqtap, saqtyq sharalaryn asa mán berýimiz kerek», - dedi ol.
Naýryzbai qajy Taǵanuly meshitke kelýshilerge kelesi talaptardy saqtaýǵa shaqyryp, úndeý tastady:
- meshitke kelýshi barsha jamaǵatty meditsinalyq maska jáne qolǵap kiip kelýge;
- antiseptik quralyn jii qoldanýǵa;
- jeke qulshylyq jasaý kezinde bir jarym metr ara qashyqtyqty saqtaýǵa;
- Quran oqityn bólmede bir jarym metr qashyqtyqty saqtap otyryp, on adamnan artyq kirmeýge;
- neke qidyratyn bólmege tórt adamnan artyq kirmeýge;
- meshit imamdarynyń keńesine qulaq asyp, meshitke lek-legimen, kezekpen kirýge;
- meshitke 15 minýttan artyq bolmaýǵa (meshit aýasyn ár úsh saǵat saiyn tazartyp otyrý úshin).
