Qazaqstan musylmandary dini basqarmasynyń basshysy, bas múfti Naýryzbai qajy Taǵanuly Qurban ait qarsańynda kásipkerlerge úndeý joldady, dep habarlaidy "Ult aqparat".
«Qadirli otandastar! Qurmetti kásipkerler! Musylman qaýymynyń ulyq meiramy – Qurban aitqa sanaýly kúnder qaldy. Ulyq kúnde isi musylman balasy shynaiy nietpen qurban shalyp, qurbandyq etin múgedekter men jetimderge, kópbalaly otbasylar men qarttarǵa taratyp, alǵysyn alýǵa tyrysady. Adamnyń alǵysyn alyp, batasyna bólený – saýapty istiń biri. Halqymyz «Alǵys alǵan arymas. Bota alǵansha, bata al» deidi emes pe? Qurban aitta oryndalatyn negizgi izgi amaldyń biri – qurban shalý. Óitkeni ardaqty Paiǵambarymyz Muhammed (oǵan Allanyń salaýaty men sálemi bolsyn): «Adam balasy qurban ait kúni qurban shalýdan ózge amalymen Allaǵa jaqyndaǵan emes...» deidi. Demek Qurban ait kúni Allaǵa unamdy ári eń súiikti amal – qurban shalý. Ait kúnderi halyq tarapynan mal satyp alýǵa degen suranystyń arta túsetini belgili. Osy rette elimizdegi barsha sharýa qojalyqtarynyń qojaiyndaryn ulyq meiram – Qurban aittyń qurmetine mal qunyn sharyqtatpai, halyqqa ońtaily baǵany usynýǵa shaqyramyn. Sonymen qatar, barsha kásipkerlerdi turǵyndar kúnde tutynatyn áleýmettik mańyzy bar azyq-túlik baǵasyna múmkindiginshe jeńildik jasaýǵa úndeimin» delingen QMDB taratqan bas múftidiń úndeýinde.
Onyń aitýynsha, Qurban aittyń negizgi máni - musylmandar arasynda ózara meiirim, jomarttyq, qaiyrymdylyq, qanaǵat syndy adamgershilik qundylyqtardy qalyptastyrý.
«Allanyń raqym nury tógiletin qurban aitta jurtymyzǵa jaqsylyq jasap, kópshiliktiń rizashylyǵyna bóleneiik. Jaratýshy Iemiz Quranda: «Ózderiń jaqsy kórgen nárseni Alla jolyna jumsamaiynsha igilikke jetpeisińder» («Ál-Imran» súresi, 92-aiat) dep baiandaǵan. Saýaptar eselenip jazylatyn sátterde Alla razylyǵy úshin eldiń jaǵdaiyn eskerip, taýar baǵalaryna jeńildik jasap, ár otbasyǵa qýanysh pen merekelik kóńil kúi syilaýǵa tyrysaiyq. Ardaqty aǵaiyn! Súiikti Paiǵambarymyz Muhammed (oǵan Allanyń salaýaty men sálemi bolsyn): «...Kimde-kim musylman baýyrynyń qajetine jarasa, Alla Taǵala da onyń qajetin óteidi...» degen súiinshi habar jetkizgen. Qazaqstan musylmandary dini basqarmasy qýańshylyqtan zardap shekken óńirlerdegi sharýalarǵa qoldaý kórsetý maqsatynda «Qiyndyqta el birge» atty qaiyrymdylyq aktsiiasyn bastady. Aktsiia aiasynda Qyzylorda, Mańǵystaý oblystaryna jem-shóp jóneltiletin bolady. Osy igi iske úles qosyp, synaqty sátterdi bastan keship otyrǵan otandastarymyzǵa qol úshyn sozýǵa shaqyramyn. Haq Taǵala kásipterińizge bereke, igi isterińizge mol saýaptan jazǵai! Ámin» dep túiindeidi úndeýin Naýryzbai qajy Taǵanuly.
