Qazaqstan musylmandary dini basqarmasynyń tóraǵasy, Bas múfti Naýryzbai qajy Taǵanuly musylman qaýymyn Oraza ait merekesimen quttyqtady.
Ol Oraza ait – júrekke qýanysh pen meiirim syilaityn, adamzat balasyn izgilikke, dostyq pen baýyrlastyqqa, qanaǵat pen qaiyrymdylyqqa úndeitin meiram ekenin atap ótti.
"Ait sózi – merekeleý, hal surasý, bir-birin qýantý, qýanyshqa toptalý, qarymta degen uǵymdy bildiredi. Oraza ait – qasietti Ramazan aiynyń aiaqtalǵanyn bildiretin mereke. Alla Taǵala: ...Olar Men úshin oraza ustady, Meniń pármenimmen aýyz ashty, endi qýanyshqa kenelsin... deidi. Jaratýshy Iemiz siz ben bizdiń qýanyshty kúnderimizdi eselei tússin dep tileimin", - delingen quttyqtaýda.
Jer betindegi kúlli musylman úmbeti ait kúnderi hal surasyp, bir-birin quttyqtap, máre-sáre kúi keshedi. Sonymen qatar, kómekke muqtaj jandarǵa járdemdesip, olardy da qýanyshqa bóleidi.
"Oraza ait – otbasylyq mereke. Ait kúnderi ata-anamyzdy, ul-qyzdarymyzdy, aǵa-baýyrlarymyzdy qýanyshqa keneltip, qaraýsyz qalǵan qarttarǵa, jetimder men múgedek jandarǵa kómektesýdiń saýaby mol", - dedi Taǵanuly.
Bas múfti Qazaqstan musylmandary dini basqarmasy Ramazan aiynda aýyzashar qoraptaryn taratyp, qaiyrymdylyq jobalaryn júzege asyrǵanyn atap ótti. Ol osy igi iske atsalysqan eriktilerge, demeýshiler men jomart jandarǵa airyqsha alǵys aitty.
Pandemiiany eskerip, dini basqarmanyń pátýasy men meshit tártibine baǵynyp, qulshylyǵyn úide oryndap, orazasyn oqshaý túrde ustaǵan jamaǵatqa rizashylyǵyn bildirdi.
QMDB tóraǵasy ár otbasyna jaqsylyq, orazadan orazaǵa aman-esen jetýdi, juqpaly indettiń tezirek joiylýyn tiledi.
Búgin, 12 mamyr – qasietti Ramazan aiynyń sońǵy kúni. Al erteń, 13 mamyrda musylman qaýymy úshin ulyq mereke – Oraza ait bastalady.
Biyl Oraza ait namazy meshitterdiń aýlasynda oqylady.
