Qazaqstannyń boks quramasynyń bas bapkeri Ǵalymbek Kenjebaev Tokio Olimpiadasynda óner kórsetken otandyq boksshylardyń sátsiz jekpe-jegine qatysty túsinikteme berdi, dep habarlaidy QazAqparat.
«Boksshylardyń daiyndyǵy jetkilikti deńgeide boldy, olardyń olimpiadadaǵy kórsetkishterine qatysty ózime de suraq qoiyp jatyrmyn. Sportshylar daiyndyqtyń barlyq deńgeiinen ótti jáne ózara synǵa da tústi. Olimpiadada boksshylarǵa psihologiialyq qysym keri áserin tigizdi dep oilaimyn, desek te barlyǵy da tájiribeli sportshylar», - dedi Kenjebekov OKQ-de onlain ótken baspasóz máslihatynda.
Sondai-aq, elimizdiń bas bapkeri boksshylar Tokio klimatyna sáikes keletin kórshi Reseide nege daiyndalmady degen suraqqa jýap berdi.
«Pandemiiaǵa bailanysty Vladivostokqa baryp jattyǵýdyń reti kelmedi. Onda Reseidiń qurama komandasy jattyǵyp, bizdi de shaqyrǵan bolatyn. Karantindik shekteýlerden bara almadyq. Jalpy Vladivostokta shetelden kelip, jattyǵý ótkizgisi kelgen niet bildirýshilerdiń sany kóp boldy, degenmen karantinge bailanysty olarǵa tyiym salyndy. Bizdiń boksshylar Almatydaǵy «Aqbulaq» bazasynda jattyqty. Sportshylarymyz Tokioǵa 17-sinde bardy, araǵa on kún salyp boksshylardyń alǵashqy jekpe-jegi ótti. Sondyqtan da jergilikti klimatqa beiimdelý úshin ýaqyt jetkilikti boldy», - deidi ol.
