Ulttyq bank tóraǵasy Erbolat Dosaev kreditterdiń aiyppuly men ósimaqysyn óteý sharalary qalai atqarylatynyn málimdedi, dep habarlaidy Sputnik Qazaqstan.
"Prezident Qasym-Jomart Toqaevtyń Qazaqstan azamattarynyń borysh júktemesin azaitý týraly jarlyǵyn iske asyrý maqsatynda Ulttyq bank Úkimetpen, banktermen jáne mikroqarjylandyrý uiymdarymen 2019 jylǵy 1 maýsymdaǵy jaǵdai boiynsha kepilsiz tutynýshylyq qaryz boiynsha 300 myń teńgeden aspaityn somada ómirlik qiyn jaǵdaida qalǵan azamattardyń bereshegin óteý mehanizmin ázirledi", - dedi Dosaev úkimettiń búgingi otyrysynda.
Bas bankirdiń aitýynsha, atalǵan júie aiasynda aldymen ómirlik qiyn jaǵdaida qalǵan azamattardyń tizimi jasalady. Ony eńbek jáne halyqty áleýmettik qorǵaý ministrligi ázirleidi.
"Odan keiin atalǵan tizim boiynsha bereshek memlekettik biýromen, ekinshi deńgeili banktermen jáne mikroqarjy uiymdarymen salystyrylyp tekseriledi. Sodan soń bankterge jáne mikroqarjylandyrý uiymdaryna aqsha aýdarylady. Bul mehanizmdi eki aida aiaqtaý josparlanyp otyrmyz. Budan ary eńbek ministrligi tizimdi naqtylaǵan jaǵdaida qarjy ministrligi men eńbek ministrligi uiymdastyrýshylyq jáne qarjylyq sipattaǵy tiisti sharalardy qabyldaýy qajet bolady", - dedi Dosaev.
Al ulttyq bank ekinshi deńgeili bankter men mikroqarjylandyrý uiymdarymen birlese otyryp, 2019 jylǵy 1 shildedegi jaǵdai boiynsha eseptelgen kepilsiz tutynýshylyq qaryzy bar barlyq azamat úshin aiyppuldar men ósimpuldardy óteý mehanizmin ázirledi.
"Bul mehanizm boiynsha bankter men mikroqarjylandyrý uiymdary aldymen eseptelgen aiyppuldar men ósimpuldardy derbes kóshirip alady. Budan keiin operator bankter men mikroqarjylandyrý uiymdarynyń shyǵystaryn 70 protsenttik diskontpen óteýdi júzege asyrady, iaǵni is júzinde aiyppuldar men ósimpuldardyń úshten ekisinen astamy bankter men mikroqarjylandyrý uiymdarynyń qarajaty esebinen esepten shyǵarylady. Bul mehanizmdi de eki aida aiaqtaý josparlanýda", - dedi Dosaev.
