Ortalyq kommýnikatsiialar qyzmetinde ótken brifingte QR Bas áskeri prokýratýrasynyń ókilderi Arystaǵy jarylysqa kinálilerdi anyqtaý qansha ýaqytqa sozylatynyn aitty, dep habarlaidy QazAqparat tilshisi.
Bas áskeri prokýrordyń orynbasary Darhan Erjanovtyń aitýynsha, jarylysqa kináli retinde kúdiktilerdi ataýǵa áli erte.
«Áýeli tergeý jospary qurylǵan bolatyn. Sol josparǵa sai eki baǵyt boiynsha jumys júrip jatyr. Birinshi kezeńde oqiǵa ornyn zertteý arqyly tótenshe oqiǵanyń sebebin anyqtaýǵa kúsh salynady. Áskeri qoimanyń jumysyna qatysty qujattardyń bárin kóterip jatyrmyz. Osy kezeńde búginge deiin 100-den astam adamnan jaýap aldyq. Ázirge kúdiktiler týraly aitýǵa erte. Mamandar qazir apat kezindegi dálelder men aiǵaq zattardy tirkep jatyr», - dedi áskeri prokýratýra ókili.
Bas áskeri prokýrordyń orynbasary tergeý jumystarynyń 2-5 ai kóleminde júretinin aitady.
«Qylmystyq protsessýaldyq zańnamaǵa sáikes mundai tekserýler 2 ai kóleminde júrýi tiis. Eger osy ýaqyt ishinde jetkilikti dálelder jinalmasa, qylmystyq is 4-5 aiǵa deiin sozylýy múmkin», - dedi Darhan Erjanov.
Sondai-aq, ol Arystaǵy jarylystyń yqtimal sebepterin atady.
QR Bas áskeri prokýrordyń orynbasary Darhan Erjanovtyń aitýyna qaraǵanda, atalmysh tótenshe oqiǵa boiynsha Qylmystyq kodekstiń 462 babynyń 3 bólimen sotqa deiingi tergeý júrip jatyr. Búginge deiin 100 adamnan jaýap alynǵan.
«Atalmysh bap qarý-jaraqpen, ainalaǵa qaýip tóndiretin zattarmen jumys isteý qaǵidalaryn buzý faktilerin qamtidy. Abaisyzdyq saldarynda 2 nemese odan da kóp adamnyń ólimi tirkelse, jaýapty tulǵalardy 5-ten 10 jylǵa deiin bas bostandyǵynan aiyrý jazasy qarastyrylǵan», - dedi áskeri prokýratýra ókili.
QR Bas áskeri prokýrordyń aǵa kómekshisi Erkin Qoja-Ahmettiń aitýynsha áskeri qoima jarylysyna birneshe jait sebep bolýy múmkin.
«Arys qalasyndaǵy №44859 áskeri bólimniń oq-dáriler qoimasyndaǵy jarylystyń sebebi retinde kóptegen faktorlar qaralyp jatyr. Sonyń ishinde órtke qarsy qaýipsizdik erejeleriniń saqtalmaýy, laýazymdy tulǵalardyń salǵyrttyǵy siiaqty nusqalar zerttelýde. Oq-dáriler saqtalatyn qoimalardyń qaýipsizdigin saqtaýǵa bólingen biýdjettik qarajattyń utymdy paidalanylýy, jarylǵysh zattardyń durys jinalýy tekserilýde. Qoimalarda anyqtalǵan buzýshylyqtardyń ýaqtyly joiylǵany, al joimaǵan bolsa, áskeri qyzmetshilerdiń áreketsizdigi jaily is qaralady. Tergeý kezinde jaýapty tulǵalardyń is-áreketterine quqyqtyq baǵa beriletin bolady. Joǵaryda atalǵan saralaý men nusqalar aldyn ala boljam ekenin aita ketý kerek», - dedi ol.
Bas áskeri prokýratýra ókilderiniń aitýynsha, atalmysh tekserýdi Ishki ister ministrliginiń tájiribeli mamandary júrgizetin bolady. Tergeýge jaýapty organdardyń jumysyn tiimdi úilestirý maqsatynda áskeri jáne aýmaqtyq prokýratýra ókilderi tartylǵan.
Aita ketsek, QR Tótenshe jaǵdailar komitetiniń tóraǵasy Vladimir Bekker Arystaǵy apattyń shyǵyn kólemin shamamen 20 mlrd teńge dep baǵalaǵan bolatyn.
Qazir Arys arqyly júretin jolaýshylar poiyzdarynyń júrý kestesi tolyq qalpyna keltirilgen.
Túrkistan oblysy ákiminiń tapsyrmasymen Arystaǵy kásipkerler 2020 jylǵa deiin salyqtan bosatylyp otyr.
