«Barys» búgin Qurlyqtyq hokkei ligasyndaǵy kezekti oiynyn Reseide «Severstal» (Cherepovets) komandasyna qarsy ótkizdi, dep habarlaidy QazAqparat.
«Barys» biylǵy týrnirdi sátsiz ótkizip júr. Sońǵy alty kezdesýdiń ekeýinde joly boldy, qalǵanynda qarsylastaryna ese jiberip qoidy.
Saldarynan «Barys» 24 upaimen týrnir kestesinde 21-orynda keledi.
Búgingi kezdesýdi elordalyq hokkeishiler belsendi bastaǵan edi. Nátijesinde 2-minýtta Kirill Savitskii «Barysty» alǵa shyǵardy.
Budan keiin reseilik hokkeishiler basymdyǵyn arttyrdy. «Severstal» sapynan Ilia Hohlov 11, Ivan Emets 19-minýttarda mergendik tanytty. Osylaisha olar alǵa shyqty.
Ekinshi kezeńniń 21-minýtynda qazaqstandyq Roman Starchenko tarazy basyn teńestirdi. Al 24-minýtta Maksim Kolmykov qaitadan «Severstal» komandasyn alǵa shyǵardy.
«Barys» oiynshysy Olle Alsing 48-minýtta taǵy da tarazy basyn teńestirdi.
Negizgi kezeń 3:3 esebimen aiaqtalyp, oiyn overtaimǵa ulasty. Overtaimda «Barys» sapynan Kertis Volk jeńis shaibasyn soqty.
Osylaisha qatarynan tórt oiyndaǵy sátsizdikten keiin elordalyq klýb jeńiske jetti.
Endi «Barys» 23 qyrkúiekte elordada Belarýstiń «Dinamo» (Minsk) komandasyn qabyldaidy. Al «Severstal» syrt aidynda «Vitiaz» (Podolsk) komandasymen sheberlik baiqasady.
