«بارىس» بٷگٸن قۇرلىقتىق حوككەي ليگاسىنداعى كەزەكتٸ ويىنىن رەسەيدە «سەۆەرستال» (چەرەپوۆەتس) كومانداسىنا قارسى ٶتكٸزدٸ, دەپ حابارلايدى قازاقپارات.
«بارىس» بيىلعى تۋرنيردٸ سەتسٸز ٶتكٸزٸپ جٷر. سوڭعى التى كەزدەسۋدٸڭ ەكەۋٸندە جولى بولدى, قالعانىندا قارسىلاستارىنا ەسە جٸبەرٸپ قويدى.
سالدارىنان «بارىس» 24 ۇپايمەن تۋرنير كەستەسٸندە 21-ورىندا كەلەدٸ.
بٷگٸنگٸ كەزدەسۋدٸ ەلوردالىق حوككەيشٸلەر بەلسەندٸ باستاعان ەدٸ. نەتيجەسٸندە 2-مينۋتتا كيريلل ساۆيتسكيي «بارىستى» العا شىعاردى.
بۇدان كەيٸن رەسەيلٸك حوككەيشٸلەر باسىمدىعىن ارتتىردى. «سەۆەرستال» ساپىنان يليا حوحلوۆ 11, يۆان ەمەتس 19-مينۋتتاردا مەرگەندٸك تانىتتى. وسىلايشا ولار العا شىقتى.
ەكٸنشٸ كەزەڭنٸڭ 21-مينۋتىندا قازاقستاندىق رومان ستارچەنكو تارازى باسىن تەڭەستٸردٸ. ال 24-مينۋتتا ماكسيم كولمىكوۆ قايتادان «سەۆەرستال» كومانداسىن العا شىعاردى.
«بارىس» ويىنشىسى وللە السينگ 48-مينۋتتا تاعى دا تارازى باسىن تەڭەستٸردٸ.
نەگٸزگٸ كەزەڭ 3:3 ەسەبٸمەن اياقتالىپ, ويىن وۆەرتايمعا ۇلاستى. وۆەرتايمدا «بارىس» ساپىنان كەرتيس ۆولك جەڭٸس شايباسىن سوقتى.
وسىلايشا قاتارىنان تٶرت ويىنداعى سەتسٸزدٸكتەن كەيٸن ەلوردالىق كلۋب جەڭٸسكە جەتتٸ.
ەندٸ «بارىس» 23 قىركٷيەكتە ەلوردادا بەلارۋستٸڭ «دينامو» (مينسك) كومانداسىن قابىلدايدى. ال «سەۆەرستال» سىرت ايدىندا «ۆيتياز» (پودولسك) كومانداسىمەن شەبەرلٸك بايقاسادى.
