Samal Esliamova basty róldi somdaityn «Barymtashylar. Ýaqyt joly» filmi otandyq prokatqa shyqty, dep habarlaidy QazAqparat.
«Qazaqfilm» jáne japondyq Tokyo New Cinema kompaniiasy atsalysqan «Ýaqyt joldary» filminde tynysh ómiriniń shyrqyn buzyp, barymtashylar otaǵasyn aiaýsyz óltirgen otbasy týraly baiandalady.
Kartinanyń rejisserleri - Erlan Nurmuhambetov (Qazaqstan) jáne Liza Takeba (Japoniia).
«Japondyq rejissermen Kann kinofestivalinde tanystym. Bul festivalge Nur-Sultan qalasyndaǵy óner ýniversitetiniń atynan qatysqan edim. Rejisserge filmniń stsenariii týraly aityp berdim, oǵan kartinanyń jelisi birden unady. Keiin telefon arqyly bailanysqa shyqtyq, ol meni japondyq prodiýsermen tanystyrdy. Nátijesinde «Qazaqfilm» kinostýdiiasynyń qoldaýyn taýyp, filmniń túsirilimine kiristik», - dedi rejisser Erlan Nurmuhambetov.
Aita ketsek, filmde basty rólderdi Kann kinofestivalinde úzdik aktrisa atanǵan Samal Esliamova, tanymal qazaqstandyq teatr jáne kino akteri Dýlyǵa Aqmolda jáne japondyq akter Mirai Moriiama, al ákesin joǵaltqan balanyń rólin Mádi Minaidarov esimdi jas akter somdady.
«Men Esik qalasynyń turǵynymyn. Ol sol jerde akterlik kýrstan óttim. Oqýdy bitirgennen keiin bizdi kastingke shaqyrdy, men óz taǵdyrymdy synaý úshin Almatyǵa keldim. Erlan aǵa maǵan basty róldi berdi. Maǵan kino óte unady. Basynda qiyn boldy. Ásirese, atqa minip júrý, óitkeni men buryn atqa minip kórgen emespin. Kaskaderler maǵan kómektesti, úiretti»,-deidi 14 jastaǵy Mádi Menaidarov.
Aita keteiik, «Barymtashylar. Ýaqyt joly» filmi alǵash ret 2019 jyly Aziiadaǵy eń iri kinofestivalderdiń biri – halyqaralyq Býsan kinofestivali sheńberinde kórsetildi.
Al byltyr atalǵan týyndy Tokiodaǵy halyqaralyq kinofestival sheńberinde kórsetilip, Japoniiada prokatqa shyqty. Sondai-aq kartina Göteborg International Film Festival atty Skandinaviiadaǵy eń iri festivalde kórsetildi.
Odan bólek film Gonkong, Praga, Barselona, Niý-Deli, Helsinki, Toronto, Kottbýs, Jeneva syndy qalalarda ótken festivalderge qatysty.
2021 jyldyń 29 maýsymynda «Ýaqyt joldary» filmi Frantsiiada prokatqa shyǵyp, 20-dan astam qalada kórsetildi.
Qazan aiynda Qazaqstan men Japoniia birlesip túsirgen film sandyq TV+ telearnasy arqyly kórsetiletin bolady.
