Qazaqstan men Japoniia birlesip túsirgen «Barymtashylar. Ýaqyt joly» atty tolyqmetrajdy filminiń álemdik tusaýkeseri Aziiadaǵy eń iri festivaldiń biri – 3-12 qazan aralyǵynda ótetin 24-shi halyqaralyq Býsan kinofestivali sheńberinde ótedi, dep habarlaidy QazAqparat «Qazaqfilm» kinostýdiiasyna silteme jasap.
Atalǵan film 5 000-nan astam kórermendi jinaityn Ońtústik Koreianyń eń úlken kino alańy – Býsan kino ortalyǵynda (Busan Cinema Center) festivaldiń ashylý saltanatynda kórsetiledi. Aita ketsek, bul ortalyq festivaldiń ashylý jáne jabylý saltanatynda ǵana jumys isteidi.
Esterińizge sala ketsek, «Barymtashylar. Ýaqyt joldary» filminiń óndirisin Qazaqstan tarapynan QR Mádeniet jáne sport ministrliginiń tapsyrysy boiynsha Sh. Aimanov atyndaǵy «Qazaqfilm» AQ iske asyrsa, japon tarapynan – «Tokyo New Cinema» kompaniiasy júzege asyryp otyr. «Barymtashylar. Ýaqyt joly» filmi jylqy baǵýmen ainalysatyn qarapaiym otbasy týraly baiandaidy. Bir kúni jylqy úshin adam óltirýden taiynbaityn barymtashylar otaǵasyn óltiredi. 12 jasar Oljas barymtashylardyń qolynan mert bolǵan ákesiniń ólimine qaiǵyryp, zulymdyqpen kúresip, otbasylaryna túsken aýyrtpalyqty qaryndastarymen birge keshedi. Qorǵansyz qalǵan Oljastyń otbasyna ǵaiyptan paida bolǵan bógde bireý qol ushyn sozady.
«Filmniń stsenariii Qazaqstanda oryn alǵan shynaiy oqiǵaǵa negizdelgen. Jaqyndarynan aiyrylýdyń qandai qiyn ekendigin osy oqiǵa arqyly kinematografiialyq tilmen jetkizgim keldi», - dedi rejisser Erlan Nurmuhambetov.
Aita ketsek, filmdi túsirýde tájiribieli internatsionaldy top jumys istedi, olar: «Jańǵaq tal» filmi úshin 20-shy Býsan kinofestivaliniń «Jańa tolqyn» (New Currents) baǵdarlamasynda úzdik atanyp, Bas júldeni iemdengen rejisser Erlan Nurmuhambetov (Qazaqstan), filmniń teń rejisseri Liza Takeba (Japoniia), japondyq prodiýser Siodzo Ichiiama (Takesha Kitano, Tszia Djangke, Hoý Siaosiania syndy tanymal rejisserler túsirgen filmderdiń prodiýseri), prodiýser Iýliia Kim (Qazaqstan/Frantsiia), Berlin kinofestivalinde «Aslannyń sabaqtary» filmi úshin «Kúmis Aiý» júldesimen marapattalǵan qoiýshy operatory Áziz Jambakiev (Qazaqstan).
Filmde basty rólderdi Kann kinofestivalinde úzdik aktrisa atanǵan Samal Esliamova (Qazaqstan), tanymal qazaqstandyq akter Dýlyǵa Aqmolda jáne japondyq akter Mirai Moriiama somdaidy. Sondai-aq filmge Mádi Minaidarov esimdi jas akter tústi (Oljastyń rólinde).
«Eki eldiń kinematografisteri birlesip túsirgen filmge túskenime qýanyshtymyn. Túsirilim jumystary Qazaqstannyń kórkem jerlerinde ótti. Japondyq akter Mirai Moriiama - óte jaqsy akter, onymen birge jumys isteý óte unady», - dedi Samal Esliamova.
«Barymtashylar. Ýaqyt joldary» filmi Býsan kinofestivaliniń ashylý saltanatynda – 2019 jyly 3 qazanda kórsetiledi.
Aita keterligi, Halyqaralyq Býsan kinofestivali eń alǵash ret 1996 jyldyń qyrkúiek aiynda ótkizilgen bolatyn. Jyl saiyn bul kino alańynda ár eldiń akterleri, rejisserleri men prodiýserleri, sondai-aq kino óneriniń tabynýshylary bas qosady. Atalǵan festival aziialyq jáne Ońtústik Korei elinde túsirilgen filmderin nasihattaýǵa baǵyttalǵan basty baiqaý.
