Qazaq Ulttyq agrarlyq ýniversiteti janyndaǵy Halyqaralyq Vaktsinologiia ortalyǵynyń direktory Qaisar Tabynov koronavirýsqa qarsy qai vaktsinalar naryqqa shyǵýy kerektigin túsindirdi, dep habarlaidy QazAqparat.
«Álemdegi jaǵdaiǵa jalpy toqtalsaq, qazirgi kezde 31 kandidat vaktsina klinikalyq zertteý kezeńinde tur. Onyń ishinde altaýy klinikalyq zertteýdiń sońǵy kezeńine deiingi úshinshi satysyna jetti, iaǵni olar basqalaryna qaraǵanda ozyq kele jatyr. Osy tusta qysqa jáne uzaq merzimge negizdelgen jaǵdaidy eskerý kerek. Qazir úshinshi kezeńdegi alda turǵan barlyq kompaniialar vaktsinalary osyǵan deiin keńinen paidalanylmady. Bul turǵyda qaýipsizdikke, tiimdilikke qatysty suraqtar kóptep qoiylyp jatqany belgili. Sarapshy retinde aitarym, naryqqa óziniń tiimdiligin kórsetken vaktsinalar shyǵady», - dedi ol koronavirýstyń ekinshi tolqynyń júrý múmkindigin talqylaýǵa arnalǵan onlain jiynda.
Sonymen qatar Qaisar Tabynov qazirgi kezde reseilik vaktsinanyń klinikalyq zertteýleri jalǵasyp jatqanyn atap ótti.
«Vaktsinolog retinde ne úshin alańdap otyrmyn? Vaktsinany tirkeý týraly asyǵys jasalǵan sheshimderdiń saldarynan jalpy vaktsinalaýǵa qatysty halyqtyń senimi tómendeidi. Ózderińiz bilesizder, vaktsinalaýǵa qarsy pikir aitýshylar bar. Qysqa merzimde tiisti deńgeide tekserilmegen vaktsinalardy ainalymǵa shyǵarǵanda jaǵymsyz jaǵdailar oryn alsa, onda bul ahýal vaktsinalaýdyń tutas salasyn kúmándi etedi. Sondyqtan biz vaktsinany shyǵaratyn bolsaq, ony tekserilgen tehnologiialarda júzege asyrǵan jón. Ekinshiden, osy vaktsinalar barlyq tiisti zertteý kezeńderinen ótýi tiis», - dedi Halyqaralyq Vaktsinologiia ortalyǵynyń direktory.
