Ulttyq banktiń aqsha-kredit saiasaty departamentiniń direktory Jandos Shaimardanov 2020 jyldyń IV toqsanynda ekonomikanyń naqty sektoryndaǵy kásiporyndarǵa júrgizilgen saýalnama nátijesi týraly aitty, dep habarlaidy QazAqparat.
Onyń aitýynsha, kásiporyndar arasynda Ulttyq bank júrgizgen saýalnama nátijeleri boiynsha 2020 jyldyń IV toqsanynda barlyq salada básekelestiktiń mańyzdylyǵy joǵary deńgeige ie bolǵan.
Saýda kásiporyndary naryqtyq básekeniń yqpalyna kóp ushyraidy, munda respondentterdiń 42,5%-y básekelestiktiń óz biznesine áser etkenin aitady. Óńdeý ónerkásibinde mundai kásiporyndardyń úlesi 31,0%-ǵa jetedi, al taý-ken ónerkásibinde 12,2% ǵana.
IV toqsanda daiyn ónimge qatysty suranys jaǵdaiy birshama jaqsardy. Aýyl sharýashylyǵynda diffýziia indeksi – 57,5 suranys ta ósip keledi, óńdeý ónerkásibi oń aimaqqa kirdi (DI – 51,7), kólik, qurylys jáne taý-ken ónerkásibinde quldyraý báseńdedi. Saýda salasynda suranystyń tómendeýi turaqtaldy. Sonymen birge barlyq salada shikizat pen material baǵasynyń ósý qarqyny baiaýlady.
«2021 jyldyń I toqsanynda suranys jaǵdaiy odan ári jaqsarady dep kútiledi, DI-diń eń úlken ósimi óńdeý ónerkásibinde (DI – 58,1), qurylysta (DI – 59,6) jáne saýdada (DI – 56,1) bolady dep boljanýda.Kásiporyndar daiyn ónimge suranystyń ósýin, shikizat pen materialdar baǵasynyń ósýiniń jedeldeýin, sondai-aq jalaqy jaǵdaiynyń jaqsarýyn kútedi. Sonymen birge óndiris kóleminiń maýsymdyq tómendeýi bolýy múmkin»,- deidi Jandos Shaimardanov.
Saýalnamaǵa barlyǵy 2,6 myńnan astam taý-ken jáne óńdeý ónerkásibi, qurylys, saýda, aýyl sharýashylyǵy, kólik jáne qoima kásiporyndary qatysty.
