Barlyq bilim berý uiymdary jumysty bastaýǵa 100 paiyz daiyn bolýy kerek. Premer-ministr Asqar Mamin ákimderge osyndai mindet júktedi, jep habarlaidy "Ult aqparat".
«1 qyrkúiekke deiin az ýaqyt qaldy. Ózderińiz kórip otyrǵandai, sheshilýi tiis shuǵyl sharýalar bar. Barlyq bilim berý uiymdarynyń kúrdeli jáne aǵymdaǵy jóndeý jumystary áli aiaqtalmaǵan. Mektepterdiń 85 paiyzy ǵana jańa oqý jylyn bastaýǵa daiyn. Ákimderge qoiylatyn mindet – bútin bilim berý oshaǵy jumysty bastaýǵa 100 paiyz daiyn bolýy kerek», - dedi Úkimet basshysy búgingi otyrysta.
Premer-ministr óz sózinde Shymkent qalasy men Túrkistan oblysyna oqýlyqtardy jetkizý merzimi keshiktirilip otyrǵanyn eskertti.
«Qarjy ýaqytynda bólinbegendikten Qostanai, Pavlodar, Aqmola, Qyzylorda oblystarynda oqýlyqtar qajetti dárejede qamtamasyz etilmeýi múmkin. Osy máseleni baqylaýǵa alý kerek. Balalardy mektepke tasymaldaý men ystyq tamaq berý máselesi tolyq sheshilmegen. Basty másele – kóliktiń jetispeýi. Ásirese, Túrkistan men SQO-da. Shamamen 360 mektepte tiisti sanattaǵy otbasylardyń oqýshylaryn tamaqtandyrý uiymdastyrylmaǵan. Óńir ákimderi osy máseleni sheshýi kerek. Gúlshara Naýshaqyzy (Premer-ministrdiń orynbasary Gúlshara Ábdiqalyqova – avt), bul máseleni nazarǵa alyńyz», - dedi Asqar Mamin.
