QR Ishki ister ministrligi jylý berý maýsymy aiaqtalǵansha órt qaýipsizdigi ailyǵyn qaita bastasyn. Búgin Úkimettiń selektorlyq rejimdegi otyrysynda Premer-Ministr Baqytjan Saǵyntaev QR Ishki ister ministri Qalmuhanbet Qasymovqa osyndai tapsyrma júktedi, dep habarlaidy "QazAqparat".
«Aldaǵy táýlikterde birqatar óńirde kún sýytady dep kútilýde. Sol sebepti ákimdikterdiń, órt sóndirý jáne tótenshe jaǵdailar qyzmetteriniń nazaryn órt qaýpi máselesine aýdaramyn. Jylý berý júielerinde jylý temperatýrasy artady. Jeke úilerde pesh jaǵý kúsheiedi. Sondyqtan qaýipsizdik tehnikasynyń saqtalýyna erekshe mán berińizder. IIM jergilikti atqarýshy organdarmen birlesip, jylý berý maýsymy aiaqtalǵansha órt qaýipsizdigi ailyǵyn qaita bastasyn. Qalmuhanbet Nurmahanbetuly, bul másele sizdiń jeke baqylaýyńyzda bolsyn», - dedi Baqytjan Saǵyntaev Ishki ister ministri Qasymovqa qarata.
Sonymen qatar Premer-Ministr jylý men energiia beretin barlyq uiymdar, ákimdikterdiń turǵyn úi-kommýnaldyq qyzmetteri tutynýshylardy jetkilikti deńgeide jylýmen jáne jaryqpen qamtamasyz etsin degen tapsyrma berdi.
«Barlyq qyzmetter irkilissiz jáne apatsyz jumys isteýi qajet. Ákimdikterdiń erekshe baqylaýyna alynsyn», - dedi Úkimet basshysy.
Baqytjan Saǵyntaev áleýmettik jelide órt qaýipsizdigin tekserýshilerdiń jónsiz qylyqtaryn synaý kúsheiip turǵanyna da nazar aýdardy.
«Áleýmettik jelilerde aitylyp jatyr, tekserýshiler jeke úilerge órt qaýipsizdigin tekserýge kelgen kezde úige kiredi eken de: «Eshteńe teksermei-aq qoiaiyn, aqsha berseń, kete beremiz» deidi eken. Máseleniń barlyǵy sodan bastalyp otyr. Osyǵan basa kóńil aýdaryńyzdar. Qatań talap bolýy kerek. Sonda ǵana keshegidei bolǵan qaiǵyly jaǵdaiǵa jol bermeimiz», - dedi Premer-Ministr.
Búgingi Úkimettiń selektorlyq rejimdegi otyrysynda QR Premer-Ministri Baqytjan Saǵyntaev órtten qaza tapqan 5 balanyń ata-anasyna kóńil aitty.
Eske sala keteiik, 4 aqpan kúni túnde elordanyń Saryarqa aýdanyndaǵy «Kóktal-1» turǵyn úi alabynda jeke úidiń aýlasynda turǵyzylǵan ýaqytsha baspanada órt shyqty. Órtti sóndirý barysynda 2006, 2008, 2014, 2016, 2018 jylǵy 5 qyz balanyń denesi tabyldy.
Olardyń kishisi nebári 11 ailyq sábi edi. Órt kezinde bes balanyń ata-anasy túngi jumysta bolǵan.
