Álemge tanymal ánshi, otandasymyz Dimash Qudaibergen Úndistannyń «Hungama» tanymal distribiýtorlyq kompaniiasyna suhbat berdi, dep habarlaidy QazAqparat.
Áleýmettik jelide Dimashtyń atalmysh kompaniiaǵa bergen suhbatynan úzindi jariialandy. Suhbattyń tolyq nusqasy jaqynda jariialanbaq.
«Meniń oiymsha, kóp eńbektengen adam jetistikke jetedi. Biraq óte mańyzdy másele bar: Biz Qudaiǵa senip, oǵan únemi alǵys aityp júrýimiz qajet. Tynbai eńbek etetin kóptegen adamdy bilemin, olar senen anaǵurlym kóp jumys istep, talanty senen anaǵurlym joǵary bolýy múmkin. Adamdar bai jáne tanymal bolǵan kezde de bul Qudaidyń syiy ekenin esten shyǵarmaýy tiis», - deidi ánshi.
Onyń aitýynsha, ol «Bir aspannyń hikaiasy» ánin 25 jasynda jaza bastaǵan.
«Seniń qazaq, amerikalyq, orys ne frantsýz ekeniń mańyzdy emes. Sen bútin álemge meiirimmen qaraýyń kerek. Biz barlyq dinge, bir-birimizge qurmetpen qaraýymyz qajet. Bul – óte mańyzdy.
Qazir álemde soǵys kóp. Ne úshin? Sebebi olar aqsha tapqysy keledi. Iá, olar tabysqa kenelgisi keledi, biraq balalar, olardyń ómiri she? Osy týraly umytamyz. Sondyqtan osy ánimdi ne úshin jazǵanymdy birneshe ǵana adam túsinse de, meniń missiiam oryndalǵan bolady», - deidi ánshi.
Aita ketsek, Hungama Digital Media Entertainment – shtab-páteri Mýmbaida ornalasqan kompaniia. Ol Úndistandaǵy jetekshi tsifrlyq oiyn-saýyq kompaniia. Onyń «Hungama Music» jáne «Hungama Play» servisteri bar. Hungama Music-tiń ai saiynǵy paidalanýshylar sany 65 millionnan asyp jyǵylady.
