AQSh prezidenti Djo Baiden "jaǵdai óte jyldam ózgerýi múmkin" dep málimdep, Amerika azamattaryn Ýkrainadan dereý ketýge shaqyrdy. Bul týraly Azattyq radiosy habarlady.
"Amerika azamattary dál qazir ketýi tiis" dedi Baiden NBC News telearnasyna bergen suhbatynda.
"Álemdegi eń iri armiialardyń birimen sharýaǵa kezigip otyrmyz. Bul múlde basqa jaǵdai jáne bári tez arada jyldam ózgerýi múmkin" dedi Resei qarýly kúshterin meńzegen Baiden.
Ol sonymen birge Resei tipti Ýkrainaǵa basyp kirse de, amerikalyqtardy qutqarý úshin ásker jibermeitinin atap ótti.
"Onda bul dúniejúzilik soǵysqa ainalar edi. Amerikalyqtar men orystar bir-birine oq ata bastasa, múlde basqa álemge tap bolamyz" dedi Baiden.
Onyń pikirinshe, "eger Vladimir Pýtin [Ýkrainaǵa] basyp kiretindei aqymaq bolmasa, Amerika azamattaryna teris áser etetindei eshteńe jasamaýǵa da aqyly jetýi tiis".
Amerikanyń Wall Street Journal basylymy taiaýda amerikalyqtardy Polshadan kóshirý jospary maquldanǵanyn habarlaǵan. Amerikalyqtar ol jaqqa Ýkrainadan ózderi barýy tiis. Qańtar aiynda poliak biligi Resei basyp kirse, Ýkrainadan keletin bosqyndarǵa arnalǵan ótkel jasap qoiǵan. Varshava millionǵa deiin adamdy qabyldaýǵa daiyn.
Osy aptada AQSh memlekettik departamenti Ýkrainany "qyzyl tizimge" engizip, azamattaryna ol jaqqa barmaýǵa keńes bergen. Vedomstvo "Reseiden áskeri qaýip zoraiǵan shaqta" Ýkrainadaǵy barlyq azamattaryna elden shuǵyl ketýge keńes berdi.
Qańtar aiynda AQSh memlekettik departamenti Kievtegi elshiligi qyzmetkerlerine óz erkimen Ýkrainadan ketýge ruqsat bergen, al olardyń otbasylary ol elde qalmaýy tiis bolǵan. Ulybritaniia men Kanada da diplomattaryn evakýatsiialaǵan. Izinshe olardyń qataryna Germaniia men Avstraliia da qosyldy.
