Qazaqstanda keiingi kúnderi koronavirýs infektsiiasyn juqtyrǵandar sany nelikten kóbeiip ketti? Bul suraqqa Densaýlyq saqtaý ministri Eljan Birtanov jaýap berdi, dep habarlaidy "Ult aqparat".
«Bizde koronavirýs juqtyrý boiynsha ósim Almaty, Nur-Sultan jáne Shymkent qalalarynda baiqalady. Álbette bir táýlikte 140 adamǵa deiin tirkelý jaǵdaiy halyqtyń úreiin ushyryp otyr. Áitse de epidemiia sipatynyń ózi osyndai ekenin eskerý kerek. Al basqa memleketterde virýs juqtyrǵandardyń bir kúnde myńdap tirkelip jatqanyn da kórip otyrmyz. Bári de epidemiianyń satysyna bailanysty. Álbette adamdardyń kóptep tirkelýine mańyz berý kerek desek te, epidemiologiialyq kózqaras turǵysynan qarar bolsaq, dúisenbide 1711 jaǵdai bolsa, eshteńe istemegen jaǵdaida osy adamdardyń árbiri úsh adamnan juqtyryp, bir ǵana kúnde juqtyrǵandardyń sany 5 myńnan asyp keter edi. 5 myń adam taǵy bir táýlik qaralmai qalsa, naýqas sany 15 myńnan asyp túser edi», - dedi Eljan Birtanov Tengriniýs Instagram paraqshasynyń tikelei efirinde.
Ministrdiń aitýyna qaraǵanda, aýrýlardyń ósim qarqyny epidemiianyń shynaiy kórinisinen habar berip otyrady.
«Bizde qazir ósim qarqyny 8 paiyzdyq deńgeide. Álbette bul kórsetkishke qarasaq, naýqastar azaiyp kele jatyr dep múlde aita almaimyz. Bizdiń maqsat – 5 paiyzdan tómen, onyń artynsha 1 paiyzdan tómen kórsetkishke deiin azaitý. Sol kezde ǵana epidemiianyń shynymen báseńdegeni týraly aita alamyz. Iaǵni jańadan anyqtalǵan naýqastardyń sany jazylǵandardan az bolýy kerek. Mine, bizdiń mindet - osy», - dedi ol.
