Densaýlyq saqtaý ministri Eljan Birtanov Japoniiadaǵy lainerde bolǵan 4 qazaqstandyq jáne olarmen birge Tokiodan ushyp kelgen azamattar karantinde jatqanyn málim etti, dep habarlaidy QazAqparat.
«Shynynda da biz bul másele boiynsha aqparat alyp jatyrmyz. Ókinishke qarai, sondai jaǵdai bolyp qaldy. Densaýlyq saqtaý ministrligi atalǵan azamattardan keshirim suraidy (Tokiodan ushyp kelgen ushaqtaǵy adamdarǵa lainerdegi azamattardyń bolǵanyn habarlamaǵany úshin-red.). Bul sheshimdi qabyldaityn kezde bizde ýaqyt bolǵan joq. Sol kúni bizge sondai aqparat túsip jatty. Basqa memleketterde osyndai jaǵdai bolyp, Japoniiadaǵy lainerden elge qaitqan jolaýshylardyń arasynda Izrail men AQSh-ta koronavirýs qaitadan tabyldy», - dedi Eljan Birtanov Úkimet otyrysynan keiin tilshilerge.
Ministrdiń aitýynsha, qazaqstandyq 4 azamat elge kele jatqan reistik ushaqqa bilet alǵan.
«Bul - olardyń quqyǵy, qoldarynda tiisti qujattary, meditsinalyq qujaty bar. Olar - deni saý adamdar. Sonymen Japoniia tarapy olardyń ushaqqa minýine eshqandai qarsylyq bildirmegen. Bizdiń diplomatiialyq qyzmetter olarmen tikelei bailanysta boldy. Biraq sol ushaq beri shyqqannan keiin biz osyndai sheshim qabyldadyq. Árine, yńǵaisyz jaǵdai bolyp otyr. Biz búgin taǵy da bul máseleni qarastyrdyq. Búgin úshinshi ret taǵy da test alamyz», - dedi Densaýlyq saqtaý ministri.
Onyń sózine sensek, ushaqta bolǵandardyń bári qazir karantinde jatyr.
«4 adam - Japoniia lainerinde bolǵandar. Qosymsha 8 ekipaj múshesi men 8 jolaýshy bar. Taǵy da aita keteiin, bul azamattar naýqas emes. Bári saý», - dedi ol.
Eske sala ketsek, japondyq Diamond Princess laineriniń bortynda bolǵan Qazaqstannyń 4 azamaty Nur-Sultan qalasynyń №3 kópbeiindi aýrýhanasynyń janyndaǵy infektsiiaǵa qarsy korpýsqa ornalastyrylǵan edi. 23 aqpanda Nur-Sultan qalasyndaǵy áýejaiǵa Tokio-Nur-Sultan reisimen 20 jolaýshy kelgen. Onyń 16-sy – Qazaqstan azamaty. Tórteýi - Diamond Princess laineriniń ishinde bolǵan jolaýshylar.
