"Aramyzda eshteńe qalmaidy": Tursynbek Qabatovtyń áieli súiinshi jańalyǵyn bólisti

Foto: ashyq derekkóz

Ázilkesh Tursynbek Qabatovtyń jubaiy, aktrisa ári prodiýser Móldir Muqanova áleýmettik jelidegi paraqshasynda qýanyshty jańalyǵyn bólisti.

Óner iesi óz oqyrmandaryna súiinshi surap, alǵashqy tolyqmetrajdy filmin túsirip bolǵanyn habarlady.

«Dostar, men kino túsirdim! Ómirimniń ótpeli kezindegi kóp sheshimderimniń biri — osy týyndy. Ótpeli kezeńdegi sezimderimdi kórsettim. Kinodaǵy alǵashqy debiýtim. Qobaljyp turmyn! Qoldaýlaryńyzdy kútem! Bul filmde men birneshe armanymdy oryndadym. Sonyń biri — qazaqtyń aýyldaǵy qarapaiym ómirin emes, estetikaǵa toly, zamanaýi tirshilikti, sulý Astanamyzdy kórsetý. Shyn ǵoi, qazir kóbi ádemi úilerde ómir súredi, talǵammen ómir súredi. Qashanǵy Túrik serialdaryndaǵy Bosforǵa, ne Korei kinolaryndaǵy qalalarǵa qyzyǵa beremiz?! Bul kino tek meniń ómirim emes, bárimizdiń ómirimiz týraly. Dostyq, otbasy, aýyzbirshilik siiaqty qundylyqtardy kórsetkim keldi. 20 qarashadan soń “Aramyzda eshteńe qalmaidy”. Bári bárin biledi!» — dep jazdy ol.

Móldir Muqanovanyń bul jazbasy jelide keńinen taralyp, oqyrmandar onyń batyl sheshimin qoldap, jyly lebizderin bildirýde. Kópshilik onyń qazaq kinematografiiasyna jańa tynys ákeletinine senim bildirip, alǵashqy rejisserlik jumysyn asyǵa kútetinin jazdy.