Bala kezimizde "Kóshpendiler" men "Alasapyrandy" oqyp ósken urpaqpyz ǵoi, batyrlar márttigi bos sóz emes dep sendik. Orys klassikterindegi, Tolstoidyń bolkonskiileri ofitserlik ojdannyń saf úlgisi bop sińdi. Momyshulynyń pafosty shyǵarmalary, ekinshi jahan soǵysyndaǵy sansyz erlikter dastany... bular da sarbaz sertiniń ómirde bar ekenin sanamyzǵa quidy.
Alaida, alaida orta jolda bu túsinikke syzat tústi. Áýeli betke ustar generaldarymyz teriskei Koreiaǵa áskeri ushaq satty. Sosyn, topyrlap jemqorlyq daýy shyqty da jatty... Urlady, jedi, qamaldy, qutyldy. Úirenip kettik. Ofitser ojdany degen uǵym adyra qaldy. Aiaǵy Jańaózende qarýsyz jurtqa oq atqyzdy, jaýapkershilik kóterýge bir generaldyń jigeri jetpedi... Jaraidy, bul - taptaýryn hikaia. Aitpaǵym basqa...
Ofitserlik ojdan uǵymy jemqorlyq jailaǵan elde joqqa ainalǵanymen, tarihta da, ádil qoǵam qurǵan, áskeri dástúri berik elderde de áli bar uǵym. Tiri túsinik.
"Ofitserlik ojdan" siiaqty sporttyq minez degen de uǵym bar. Iaǵni, sporttyq minez - tabandylyq, básekege qushtarlyq, jeńiske de, jeńiliske de daiar bolý, jigerdi janyp otyrý, komandalasty satpaý... Osy kóp sharttyń ishine "bapkerge opasyzdyq jasamaý" degendi de engizýge bolady. Keshegi kórpe astyna kamera tyǵyp, jattyǵýǵa barmai, bapkerin ashýlandyryp, namaz oqyǵan bolyp, arandatqan balalarda sporttyq minez bar ma? Olar bilýimshe, sporttyq komanda múshesi bolý úshin memleket esebinen oqyp jatqan jetkinshekter. Endi bapkerine satqyndyq jasady, ózge komandalastaryn jetekshisiz qaldyrdy. Bapkerlik josparlar, ár jas sportshyǵa arnalǵan úmitter men jobalar adyra qaldy.
Ókinishtisi, balalaryn oqýdan shyǵaryp áketken ata-analardyń videojoldaýyn kóre almadym? Ne ókingen, ne aiyptaǵan... Álde arsyzdyq pen satqyndyq umytylyp ketedi dep oilai ma? Ul ósirip, ony sportqa berý - eń aldymen minez shyńdaý bolsa kerek-ti...
"Ofitserlik ojdan" aldamshy uǵymǵa ainaldy, endigi kezek "sporttyq minezge" de jetti me?..
Qasym Amanjoldyń feisbýktegi jazbasynan
