videokadr
Májilismen Ermurat Bápi Bas prokýror Berik Asylovqa depýtattyq saýal joldap, Nazarbaevtyń jaqyndary alǵan aqshany qaitarýdy talap etti, dep habarlaidy Sputnik Qazaqstan saity.
Depýtattyń aitýynsha, Májiliske túsken zańsyz kapitaldy shetelden qaitarý týraly zańnyń shiki tusy kóp. Degenmen kleptokrattar 30 jyl boiy talan-tarajǵa salǵan halyq bailyǵyn elge qaitarý kerek. Onyń kólemi shamamen 150 mlrd dollardy qurap otyr.
"Al endi osy qarjyny qaitarýǵa birinshi kezekte mindetti organdar zań qabyldanǵan soń iske kirisemiz dep, arqany keńge salýǵa bolmaidy. Elden jylystalǵan aktivterge tyqyr taianǵan saiyn kleptokrattar ony túrli shemalarmen álemniń túkpir-túkpirine tyǵý úshin jantalasyp jatyr", - dedi Bápi Májilistiń búgingi otyrysynda.
Depýtat halyqaralyq jýrnalister konsortsiýmynyń kómegimen anyqtalǵan aqparatty Bas prokýrorǵa jáne tiisti organdarǵa jetkizýden jalyqpaitynyn erekshe atap ótti. Onyń sózinshe, Bas prokýratýra zańdy kútpei, shuǵyl iske kirisýi kerek.
"Máselen, sizge belgili bolýy múmkin, biraq qoǵam úshin jańa aqparat aitaiyn, Bas prokýror myrza, siz Qazaqstannyń gazyn syrtqa satatyn Tethys (Tetis) kompaniiasyn bilesiz be? Bilmeseńiz – álemdik gaz-treid kompaniialarynyń registrine kóz júgirtińiz. "Tetistiń" basty ieleriniń biri – Qairat Sháripbaevtyń qyzy. Al ashyq aqparattyń aitýy boiynsha, Sháripbaev – Dariǵa Nazarbaevaǵa telinip júrgen kúieý ekenin bilesiz. Mine, osy "Tetis" firmasy Qairat Sháripbaev basqarǵan memlekettik monopolist "QazTransGaz" ulttyq kompaniiasynyń gazyn syrtqa satyp kelgen. Qazir jýrnalist-zertteýshiler sońǵy segiz jylda bul firma Qairat Sháripbaevtyń baqylaýyndaǵy APL (AiPiEl) Construction kompaniiasy arqyly Batys bankterine birneshe milliard dollar shyǵarǵanyn anyqtady. Keibir ashyq aqparatta 20 mlrd dollar degen málimet aitylyp júr", - dedi Bápi.
Osy oraida depýtat urlanǵan milliardtar bailyqtyń ǵana kózi emes, bilikke qaitadan aralasýdyń quraly bolýy múmkin ekenin jáne ondai qyrýar qarjyǵa shynynda da "jiyrma myń terrorshy" jaldaýǵa bolatynyn jetkizdi. Osylaisha, bul milliardtar revanshisterdiń rezervine ainalmaq.
"Ekinshi mysal aitaiyn. Máselen, Shveitsariia ókimeti Ǵalymjan Esenovtyń esepshotynda orasan zor aqsha jatqanyn anyqtady. Esenov – Esimovtyń kúieý balasy. Al Ahmetjan Esimov kimniń etjaqyny ekeni bizge de, sizge de belgili. Esepshot iesi bul aqsha ózine tiesili ekenin dáleldei almaǵan soń, shveitsariialyq tergeýshiler Ǵalymjan Esenovtyń qarjylyq qyzmeti týraly ne bilesizder dep, Qazaqstannyń Bas prokýratýrasynan kómek suramai ma? Myna qyzyqty qarańyz: Sizge deiingi Bas prokýror shveitsariialyqtarǵa Ǵalymjan Esenov "sútten – aq, sýdan – taza", oǵan qatysty qozǵalǵan is joq depti. Anyǵynda, sol kezdegi Prezidenttiń buiryǵymen Esenovke qatysty is toqtatylǵan eken", - dedi Bápi.
Depýtat Bas prokýrordy osy naqaq jabylǵan isti qaitadan qozǵaýǵa úndedi.
"Ekinshi saýal: osy Esenov myrza Jusan bank-tiń bir iegeri retinde tutastai bir bankti tegi – Bangladesh, azamattyǵy – amerikalyq Ron Vahid degen kúdikti operatsiialardyń sheberine basy bútin berýge áreket jasap jatyr. Siz quzyrly laýazym iesi retinde osy alaiaqtyqqa qarsy qandai qimyl jasamaq oiyńyz bar?"- dep surady Májilis depýtaty.
Bápi "Qazaqstan temir joly" Ulttyq kompaniiasynyń quramynda bolǵan strategiialyq mańyzy bar "Transtelekom" kompaniiasynyń eks-prezident Nazarbaevtyń nemeresi Nuráli Álievke sý tegin berilgenin de aitty.
"Balanstyq quny - 250 milliard teńge, al jyldyq túsimi 80-90 milliard teńgeni quraityn ulttyq menshik nebári 18 milliard teńgege satyldy. Osy "Transtelekom" Nuráli Álievke ár jyldary jalpy kólemi 8 milliardqa jýyq divident tólegen. Endi osynshama zańsyz tólengen aqshany tezirek qaitarý kerek", - dep túiindedi májilismen.
