2019 jyldyń 2 aqpanynan bastap bankterge ipotekalyq zaem tóleý merzimi 180 kún ótip ketkennen keiin eseptelingen syiaqyny alýǵa tyiym salynady, dep habarlaidy "Ult aqparat" QR Ádilet ministrligine silteme jasap.
«Bul túzetý jeke tulǵany (zaemshyny) syiaqy boiynsha qaryzynyń ósip ketýinen qorǵap, bankterdiń boryshkerge qatysty der ýaqytynda shara qabyldaý jaýapkershiligin arttyratyn bolady», - delingen Ádilet ministrligi taratqan aqparatta.
Aita keteiik, 2019 jyldyń 21 qańtarynda qabyldanǵan «Qazaqstan Respýblikasynyń keibir zańnamalyq aktilerine menshik quqyǵyn qorǵaýdy kúsheitý, tórelik, sot júktemesin ońtailandyrý jáne qylmystyq zańnamanyń odan ári izgilendirý máseleleri boiynsha ózgerister men tolyqtyrýlar engizý týraly» Zań aiasynda «Qazaqstan Respýblikasyndaǵy bankter jáne bank qyzmetteri týraly» Zańǵa túzetýler engizilip otyr.
