«Aq jol» partiiasynyń múshesi, Májilis depýtaty Daniia Espaeva Memleket basshysynyń óz Joldaýynda shaǵyn jáne orta biznesti qoldaýǵa baǵyttalǵan sharalaryn qoldaitynyn jetkizdi, dep habarlaidy QazAqparat.
«Prezident óziniń keiingi Joldaýy arqyly shaǵyn jáne orta biznes ókilderine úlken qoldaý kórsetip otyr. Buǵan deiin atalyp ótkendei, qazir biznes qarajatqa táýeldi bolyp tur. Elde tótenshe jaǵdai engizilgen kezde bizdiń partiia Úkimetke de, Ulttyq bankke de sol kezde kásipkerlerge kórsetilgen kómektiń az ekenin aityp, saýal joldaǵan bolatyn. Sebebi ol kezde bankterdiń bar kómegi – nesieni keiinge shegerý ǵana boldy. Alaida karantin bitkenimen kiris óspeitinin bárimiz bilemiz. Sol sebepti bul nesielerdi jeńildetilgen stavka boiynsha qaita qarjylandyrýdy usyndyq. Prezidenttiń osy rette stavkany 6 paiyzǵa deiin tómendetý týraly tapsyrmasy berildi», - dedi Daniia Espaeva OKQ-da ótken baspasóz máslihatynda.
Depýtattyń aitýynsha Qarjy naryǵyn retteý jáne damytý agenttiginiń tóraǵasy Madina Ábilqasymova qyrkúiektiń basynda ótken Úkimet otyrysynda «qiyn jaǵdaida qalǵan ShOB boiynsha qazirgi ýaqytta jyldyq ortasha stavka 15 paiyz ekenin» aityp, Úkimetke ekinshi deńgeili bankterdiń qaryzdary boiynsha 20 paiyzben qaita qarjylandyrýdy usynǵan.
«Iaǵni, biz salyq tóleýshilerdiń esebinen bankterdiń máselelerin sheshýimiz kerek eken. Olai bolmaý kerek. Sol úshin jyldyq 20 paiyzdyq ortasha stavkamen qaryz bergen bankter jyldyq stavkany 14 paiyzǵa deiin tómendetý kerek. Artynsha 6 paiyzǵa azaiady. Sol sebepti Prezidenttiń bastamasyn tolyq qoldaimyn», - dedi ol.
