QR Premer-Ministri Asqar Maminniń tóraǵalyǵymen ótken Úkimet otyrysynda kásipkerlik pen otandyq óndiristi qoldaý sharalary qaraldy, dep habarlaidy "Ult aqparat" primeminister.kz saityna silteme jasap.
Qazaqstandyq biznesti qoldaý sharalarynyń toptamasymen ulttyq ekonomika ministri R. Dálenov tanystyrdy, agroónerkásiptik keshendi yntalandyrý usynystary týraly aýyl sharýashylyǵy ministri S. Omarov, azamattardy jumyspen qamtamasyz etý týraly eńbek jáne halyqty áleýmettik qorǵaý ministri B. Nurymbetov, «Báiterek» UBH» AQ damý institýttary arqyly kásipkerlerge memlekettik qoldaý kórsetýdiń jańa tetikteri týraly Holding basqarmasynyń tóraǵasy A. Áriphanov, ekonomikalyq jaǵdaidyń bizneske áseri jáne QR Úkimeti janyndaǵy Jobalyq ofis ázirlegen daǵdarysqa qarsy sharalar týraly «Atameken» UKP basqarma tóraǵasy A. Myrzahmetov, halyq pen biznestiń borysh júktemesiniń ósýine jol bermeý týraly QR Qarjy naryǵyn retteý jáne damytý agenttiginiń tóraǵasy M. Ábilqasymova, «Samuryq-Qazyna» UÁQ» AQ sharalary týraly Qordyń basqarma tóraǵasy A. Esimov baiandady.
Biznesti qoldaý jáne eńbek naryǵyndaǵy turaqtylyqty qamtamasyz etý jónindegi shuǵyl sharalar toptamasy qarjylandyrýdyń qoljetimdiligin arttyrýdy, kepildikter berýdi, salyqtyq yntalandyrýdy, biznesti tekserýdi azaitýdy jáne jumyspen qamtamasyz etýdi qamtidy.
Atap aitqanda, 1 trln teńgege deiin nesie berý jáne «Qarapaiym zattar ekonomikasy» baǵdarlamasy boiynsha basym taýarlar tizimi keńeitiledi, «BJK – 2025» memlekettik baǵdarlamasy boiynsha nesieniń joǵarǵy shegi ulǵaitylady jáne salalyq shekteýler alynyp tastalady, biznesti nesielendirý kezinde kepildik berý tetigi jeńildetiledi.
Iri saýda nysandary, kinoteatrlar, teatrlar, kórmeler, sport obektileri zańdy tulǵalar men jeke kásipkerler úshin múlik salyǵynan bir jyl merzimge bosatylatyn bolady, bir toqsanǵa ósimaqy esepteý toqtatylady, 3 toqsan úshin salyq eseptiliginiń merzimi keiinge aýystyrylatyn bolady. Jalpy belgilengen tártipte jumys isteitin jeke kásipkerler salyqtardan bosatylady.
Otandyq biznes qosymsha qarjylyq júktemesiz biregeilendirilgen sharttarda (6%) áreket etip turǵan memlekettik baǵdarlamalardyń (Biznestiń jol kartasy – 2025, «Eńbek», IIDMB-2025, «Qarapaiym zattar ekonomikasy» jáne t. b.) qoldaýdyń jeńildikti sharalaryn paidalanatyn bolady.
AÓK salasynda nesielendirýdiń jańa tetigi, sondai-aq iri qara mal men asyl tuqymdy balapandardy qamtityn AÓK biologiialyq aktivteriniń importyna QQS-dan bosatý, sonymen qatar 7 myńǵa jýyq sharýany aýyl sharýashylyǵy maqsatyndaǵy jerlerge salyq tóleýden bosatý túrinde qosymsha salyqtyq yntalandyrýlar engiziledi.
«Memleket basshysy Qasym-Jomart Kemeluly Toqaevtyń tapsyrmasy boiynsha Úkimet shaǵyn, orta jáne iri biznes kásiporyndaryn qoldaýdyń teńdessiz sharalaryn qabyldaidy. Bul sharalar, eń aldymen, qazirgi jumys oryndaryn saqtaýǵa jáne kásipkerler men azamattardyń iskerlik belsendiligin yntalandyrý arqyly jańa jumys oryndaryn qurýǵa baǵyttalǵan», — dedi A. Mamin.
Atalǵan jumysqa Qazaqstan azamattaryn tarta otyryp, infraqurylymdyq, áleýmettik nysandardy jáne jergilikti mańyzy bar joldardy jóndeýdi qarastyratyn Jumyspen qamtýdyń jol kartasyn iske asyrýǵa 300 mlrd teńge bólinedi.
Bankter qaryz alýshylar Tótenshe jaǵdai engizilgen kezde tólemderdiń merzimin ótkizip alǵan jaǵdaida aiyppuldar men ósimpuldardy eseptemeitin bolady.
«Barlyq bankter qarjylyq jaǵdaiy nasharlaǵan biznes ókilderine tólem merzimin uzartý múmkindigin berýi kerek», — dedi A. Mamin.
Úkimet basshysy úsh kúndik merzimde salalyq memlekettik baǵdarlamalarǵa kásipkerlerdi qoldaýdyń jańa formalaryn engizý boiynsha qaýlylar jobalaryn daiyndaýdy tapsyrdy.
«Memleket basshysynyń Jarlyqtaryn iske asyrý úshin biz salyq tóleýshilerdiń jekelegen sanattary úshin salyq mólsherlemelerin belgileýdiń erekshe tártibin anyqtaý, biýdjetti qalyptastyrý men oryndaý, memlekettik satyp alýdyń arnaiy tártibin anyqtaý boiynsha kóptegen sheshimderdi qabyldaimyz. Jalpy, kásipkerlikti jáne otandyq óndiristi qoldaýdyń jańa sharalary 200 myńnan astam jańa jumys ornyn ashady», — dedi A. Mamin.
