Foto: Ortalyq kommýnikatsiialar qyzmeti
Ókiletti organdar bankrottyqqa ótinish bergen azamattyń otbasy músheleriniń de jeke múlki men tabysyn tekseredi. Bul týraly qarjy vitse-ministri Erjan Birjanov málimdedi, dep habarlaidy Sputnik Qazaqstan.
Ortalyq kommýnikatsiialar qyzmetinde ótken baspasóz máslihatynda jýrnalister "bankrot dep tanylatyn adamnyń tek óziniń tólem qabileti qarala ma, joq álde jaqyn týysynyń, mysaly áieliniń tabysy eskerile me?" dep surady.
"Bankrottyq protsedýrasy kezinde biz azamattyń múlki, otbasynyń múlki nemese qaryzy, basqa da aktivteri boiynsha maǵlumatty jinaimyz. Eger de bankrottyq kezinde jalǵan aqparat usynǵany nemese óz múlkin otbasy múshesine aýdarǵany anyqtalsa, álgi azamat bul protsedýradan ótpeidi. Sondyqtan biz bankrottyqqa ádeii ótinish berý protsedýrasyn toqtatý úshin barlyq aqparatty jinaimyz", - dep jaýap berdi Erjan Birjanov.
Osy oraida jýrnalister "mysaly, áieliniń avtokóligi bar delik, eger kúieýi bankrottyqqa tapsyrsa, ortaq múlikke ne bolady?" dep naqtylady.
"Óte durys aitasyz. Eger nekeleskennen keiin erli-zaiyptynyń ortaq múlki bolsa, bul múlik bankrottyq protsedýrasy kezinde ótinish berýshiniń qosymsha aktivi retinde sanalady, tekseriledi. Mysaly avtokólikten basqa jekemenshik páteri nemese úlesi bolsa, ol qaryzyn tóleýge múmkindigi bar azamat retinde qarastyrylady. Bankrottyqqa ótkizilmeidi", - dep túsindirdi vitse-ministr.
Aita keteri, bankrottyqqa ótinish berý 3 naýryzda bastalady.
