Jeke tulǵalardyń bankrottyǵyn retteitin zań jobasyn tanystyrǵan Memlekettik kirister komiteti tóraǵasynyń orynbasary Qairat Miiatov bankrottyq rásimdegen azamattar neshe jyl nesie ala almaitynyn aitty, dep habarlaidy QazAqparat.
«Tólem qabiletin qalpyna keltirý dep atalatyn jeke tulǵa bankrottyǵynyń úshinshi joly boryshkerge sot arqyly qaryzdy tóleý boiynsha shegerimder berýdi kózdeidi. Ol úshin tólem qabiletin qalpyna keltirý josparyn ázirleý kerek. Bul jospar qarjylyq basqarýshynyń atsalysýy arqyly ázirlenedi. Josparǵa kredidor men boryshkerdiń ekeýi de kelisim berýi qajet. Boryshkerdiń múlkin satý siiaqty sharalardyń bári tek osy josparǵa engen jaǵdaida ǵana iske asady. Josparǵa kirmegen sharalardyń bári qaryzdy qaitarý úshin qoldanylmaidy», - dedi komitet ókili.
Onyń sózinshe, Qazaqstanda 1 millionnan astam adamnyń moinynda problemalyq borysh bar. Biraq onyń bári jeke tulǵanyń bankrottyǵyny rásimdeidi degen sóz emes. Óitkeni bankrottyq rásimdeýdiń de saldary bar.
«Bankrottyq rásimdegen boryshker 5 jyl kóleminde bankter men mikrokredittik uiymdardan qaryz ala almaidy. Shetelge shyǵýǵa 3 jyl boiy tyiym salynady. Bul tyiymǵa shetelde emdelý, bilim alý, týysqanyn jerleý rásimine qatysý jáne jumysqa ornalasý sebepteri kirmeidi. Bul sebepter bolǵan jaǵdaida tiisti qujattardy kórsetý kerek bolady.
Ekinshi ret bankrottyq rásimdeý úshin aldyńǵy bankrottyqtan keiin 7 jyl ýaqyt ótýi kerek. Zań jobasynda osyndai negizgi bazalyq qaǵidattar engizilgen», - dedi Qairat Miiatov.
