Bankke, bankomatqa, terminalǵa barsam da qazaq tilin tańdaimyn. Iakýtiiadan kelgen stýdent qazaq tilin qalai úirengenin jáne qazaqtarǵa degen kózqarasyn aityp berdi, dep habarlaidy Almaty.tv.
«Meniń atym Daiaana. Jasym 22-de. Almatydaǵy Suleyman Demirel University-niń 4 kýrsyn támamdap jatyrmyn. Qazaq - óte qonaqjai, adamgershiligi mol halyq. Aitaiyn degenim, qazaq tili maǵan alǵashynda án siiaqty estildi, iaǵni túsiniksiz kórindi, biraq túrki tili ekenin birden sezindim. Men iakýt tilin jaqsy meńgergendikten, ári mamandyǵym tilge bailanysty bolǵandyqtan, bizdiń sózder uqsas ekenin birden túsindim», – dedi stýdent.
Onyń aitýynsha, kópshilik ony qazaq dep qabyldaidy.
«Birinshi kýrstan bastap bári menen «sen qazaqsyń ba?» dep suraidy. Tildi bilý, ony saqtaý óte mańyzdy dep oilaimyn. Bankke, bankomatqa, terminalǵa barsam da qazaq tilin tańdaimyn. Neǵurlym kóp adam tańdasa, jasandy intellekt bul tildi tanymal dep sanaidy jáne ony odan ári damytady. Al Iakýtskide iakýt tilinde sóileýge tyrysamyn», – deidi ol.
Sondai-aq Daiaana qazaq tilindegi «amanat» sóziniń ózine qalai áser etkenin aityp berdi.
«Amanat – tilimiz, mádenietimiz, jerimiz. Qazaqstanǵa kelgen árbir iakýt – amanat. Iakýtiiadaǵy árbir qazaq – bizge amanat, ony aman-esen týǵan eline qaitarý bizdiń paryzymyz. Bul óte keremet sóz jáne onyń keremet maǵynasy bar», – dep atap ótti Daiaana.
Sóz sońynda ol qazaq tilin qalai úirengenin aitty.
«Men qazaq tilin oqýlyqtan úirenbedim. Únemi mýzyka tyńdap, satýshylarmen, taksi júrgizýshilerimen sóilesý arqyly úirengen bolatynmyn. Qazaq tilin áli de úirenip, deńgeiimdi jetildirgim keledi», – dedi ol.
