QR Qarjy naryǵyn retteý jáne damytý agenttigi ekinshi deńgeidegi banktermen shottar jáne bank kartalaryn ashý úshin qashyqtan qyzmet kórsetý algoritmin pysyqtady, dep habarlaidy "Ult aqparat".
Memleket basshysynyń tapsyrmasy aiasynda, Agenttik ekinshi deńgeidegi banktermen birlesip tólem kartalaryn qashyqtan alý algoritmin jasady.
Memleket basshysynyń elde tótenshe jaǵdai rejiminiń engizilýi nátijesinde tabysyn joǵaltqan azamattardyń keibir sanattaryna jáne kásipkerlerge materialdyq qoldaý kórsetý boiynsha tapsyrmasyn iske asyrý maqsatynda olarǵa 42 500 teńge mólsherinde áleýmettik járdemaqy tólenedi.
Budan basqa, Birgemiz qory Qazaqstannyń barynsha muqtaj azamattaryna 50 myń teńgeden bóledi, ol da jeke tulǵanyń ekinshi deńgeidegi banktegi kartochkalyq nemese aǵymdaǵy shotyna aýdarylady. Bul tólemderdi esepteý úshin aqsha qarajaty aýdarylatyn kartochkalyq shottyń bolýy qajet», – dep habarlaidy agenttiktiń baspasóz qyzmeti..
Qazirgi kezde áleýmettik járdemaqy alý úshin bank kartalary qashyqtan ári tegin resimdeledi. On úsh ekinshi deńgeidegi bank, sondai-aq «Qazposhta» AQ bul qyzmetti qashyqtan kórsetedi.
Ol úshin:
– mobildik qosymshada (eger bolmasa, júkteý jáne ornatý), ne banktiń saitynda shot ashý;
– tirkelý jáne qashyqtan sáikestendirýden ótý;
– mobildi telefon nómirin jáne JSN engizý;
– jeke kýálikti skanirleý (suratqan jaǵdaida);
– kartanyń ashylǵanyn rastaý úshin SMS kodyn engizý qajet.
Klientke birneshe minýt ishinde shot nómiri bar SMS keledi. Keibir ekinshi deńgeidegi bankter sondai-aq kartany jetkizý boiynsha qyzmet kórsetedi. Ortasha alǵanda bul rásim 1 – 5 kún aralyǵynda júzege asyrylady. Shuǵyl qajettilik bolǵan kezde keibir ekinshi deńgeidegi bankter qolma-qol aqshany kartasyz jáne komissiialarsyz alý múmkindigin engizdi.
Sonymen birge, klientter úshin onlain servisterdiń basqa da qyzmetteri qoljetimdi bolady, olar kommýnaldyq tólemderdi, bailanys qyzmetterin tóleý, salym ashý, salyqtyq jáne kedendik tólemderdi júrgizý, jalaqy aýdarý, aqsha qarajatynyń jiberilý jolyn qadaǵalaý, POS/SMART terminaldar boiynsha úzindi-kóshirme alý. Barlyq operatsiialar komissiialarsyz júzege asyrylady.
