Ekologiia, geologiia jáne tabiǵi resýrstar ministrliginde ótken jiynda respýblikanyń birqatar óńirlerinen kelgen balyqshylar saladaǵy birqatar máselelerdi kóterdi, dep habarlaidy QazAqparat.
Máselen, Kaspii balyqshylary balyq aýlaý aýynyń jip diametri 0,3 mm-den bastalatyn monojip jáne monotalshyqtan jasalǵan aý paidalaný múmkindigin qarastyrýdy jetkizdi.
Bul máselege qatysty ministr osy jyldyń mamyr aiynyń sońyna deiin sheshim qabyldanýy múmkindigin jetkizdi.
«Salalyq ǵylymi uiym sáýir-mamyr ailarynda zertteý júrgizedi, onyń nátijesi boiynsha mamyr aiynyń sońynda sheshim qabyldaimyz. Eger tikelei teris áseri bolmaǵan jaǵdaida, atalǵan aýlardy iri sý aidyndarynda 2 jylǵa deiin pilottyq rejimde paidalanýǵa 3-4 ai ishinde zańnamaǵa tiisti ózgerister engizý arqyly ruqsat berýge bolady», - dedi Ekologiia, geologiia jáne tabiǵi resýrstar ministri Serikqali Brekeshev.
Sonymen qatar, jiynda Balqash kólinde kókserke aýlaý limitin arttyrý máselesi kóterildi.
Buǵan qatysty ministr kókserke aýlaý limitiniń ulǵaiýyn 2023 jylǵy maýsymda balyq aýlaý limitin anyqtaý ádistemesine ózgerister engizýdi eskere otyryp, qarastyrýǵa bolatynyn aitty.
Budan bólek, keńeste kásipshilik balyq aýlaýdy júzege asyrý úshin sý aidynyna qol jetkizý jáne jaǵalaý aimaǵynda turatyn jeke tulǵalardyń balyq aýlaýǵa ruqsat alýy kóterildi.
Ministrdiń sózinshe, atalǵan máseleni ministrlik jaǵalaýdaǵy turǵyndarǵa jeke ruqsat alý arqyly balyq aýlaýǵa múmkindik beretin máseleni qarastyrýda.
Sondai-aq, bekitilgen ýchaskelerde ǵana emes, rezervtik qorda da balyq aýlaýdy júzege asyrý máselesi kún tártibinde boldy.
«Biraq bul máseleler osy salada qyzmet etetin iri biznestiń pikirin eskere otyryp, keń talqylaýdy qajet etedi. Bul máseleni sheshý úshin, eń aldymen «Janýarlar dúniesin qorǵaý, ósimin molaitý jáne paidalaný týraly» zańyna ózgerister engizý qajet. Zań qabyldaýdyń belgilengen tártibi shamamen 1 jyldy talap etetinin birden atap ótkim keledi. Budan ári ruqsat berý erejesi, kvotalardy bólý erejesi, balyq aýlaý erejesi siiaqty birqatar buiryqtarǵa ózgerister engizý kerek. Alaida, biz sizderdiń kóterip otyrǵan máselelerińizdi sheshý úshin barlyq qajetti sharalardy qabyldaimyz», - dedi Serikqali Brekeshev.
Jalpy 5 saǵatqa sozylǵan jinalysta balyq sharýashylyǵyna qatysty kóptegen máseleler kóterildi.
Jinalys qorytyndysy boiynsha ministr jaýapty vedomstvoǵa birqatar naqty tapsyrmalar berdi.
