Aqtaýlyq politseiler eki azamatqa zorlyq-zombylyq kórsetken kúdiktilerdi ustady, - dep habarlaidy "Ult aqparat" Polisia.kz saityna silteme jasap.
Osyǵan deiin áleýmettik jelilerde betperde taqqan jastardyń balta jáne ózge de quraldarmen eki azamatqa zorlyq-zombylyq kórsetip jatqan video taraǵan bolatyn.
"Eki derek boiynsha da QR QK-nyń 293-baby 3-bóligi boiynsha qylmystyq is qozǵaldy. Eki oqiǵa da Aqtaý qalasynda ártúrli ýaqytta bolǵan.
Qazirgi tańda politseiler jábirlenýshiler men úsh kúdiktini anyqtady. Kúdikti retinde 16 jáne 21 jastaǵy er adamdar ustaldy. Taǵy bir kúdiktini ustaý boiynsha jedel-izdestirý sharalary júrgizilip jatyr.
Oqiǵanyń tolyq mán-jaiy anyqtalýda. Qylmys jasaǵan kúdiktiler ýaqytsha ustaý izoliatoryna qamaldy", - delingen habarlamada.
