Elordada karantin kezinde eki bala terezeden qulap, biri mert boldy. Bul týraly búgin Ortalyq kommýnikatsiialar qyzmetindegi onlain-brifingte Nur-Sultan qalalyq Politsiia departamentiniń bastyǵy Erjan Sádenov aitty, - dep habarlaidy QazAqparat.
«Qazirgi kezde meditsinalyq maskany taǵý-taqpaýǵa qatysty suraq kóp. Maskany taǵý kerek. Óitkeni, siz virýstyq infektsiiany tasymaldap nemese juqtyryp alýyńyz múmkin. Eger adam aýyrǵanyn bile tura maska taqpasa, onda bul qylmystyq jaýapkershilik bolatyndyǵyn eskertemin. Sol sebepti politsiia maskany mindetti túrde taǵýǵa keńes beredi. Bul - karantin rejiminiń normasy», - dedi ol.
Sonymen qatar departament basshysy úidegi balalardyń qaýipsizdigine basa kóńil bólýdi surady.
«Tótenshe jaǵdai kezinde 2 bala terezeden qulap, ókinishke orai onyń biri mert boldy», - dedi E.Sádenov.
Munan bólek ol keshki jáne túngi ýaqytta tynyshtyqty buzý kóbeigenine nazar aýdartty.
«Karantin kezinde úide otyrý qiyn ekenin túsinemiz. Sonda da sizderden 23.00-den keiin tynyshtyq saqtaýdy suraimyn. Munyń terezeden jáne balkonnan án aitýǵa da qatysy bar. Tynyshtyq buzǵandar ákimshilik jaýapkershilikke tartylatyndyǵyn eskertemin. Osy múmkinshilikti paidalanyp, sizderden úide bolýlaryńyzdy, zańǵa baǵynýdy jáne resmi aqparattarǵa ǵana senýdi ótinemin», - dedi departament basshysy.
