Foto: t.me/kazakhmys_news
«Qazaqmys» korporatsiiasynyń Balqash óndiristik alańyndaǵy kásiporyndarda óndiristik úderistiń turaqtylyǵyn arttyryp, qýatyn damytýǵa baǵyttalǵan óndiristik jobalardy iske asyrý jalǵasýda.
Basqarma tóraǵasy Rýslan Óskenáli óńirge jumys sapary barysynda óndiristik nysandardyń qazirgi jaǵdaiymen, atqarylǵan jumys nátijesimen jáne bolashaqtaǵy damý josparymen tanysty.
Buǵan deiin josparlanǵan sharalar aiasynda birneshe kásiporynda óndiristik jáne gidrotehnikalyq nysandardy jańartýǵa baǵyttalǵan infraqurylymdyq jumys tolyq aiaqtaldy. Atap aitqanda, baiytý fabrikasynyń usaqtaý tsehyndaǵy №9 aýystyryp tieý toraby jóndeldi, sondai-aq qaldyq saqtaý qoimasynyń bógetin kóterý jumysy júrgizildi. Aldaǵy ýaqytta bógetti ulǵaitýdyń ekinshi kezeńin iske asyrý josparlanýda.
Foto: t.me/kazakhmys_news
Óndiristik qýatty damytýmen qatar, kólik jáne tehnologiialyq infraqurylymǵa da erekshe kóńil bólinýde. 18 ashyq vagonǵa arnalǵan jylytý júiesi bar jańa ǵimarat salý máselesi qarastyrylýda. Bul jyljymaly quramnyń toqtap turýyn azaityp, kontsentrattyń úzdiksiz tasymaldanýyn qamtamasyz etedi, sondai-aq óndiristik qaýipsizdik deńgeiin arttyrady.
Sonymen qatar Vaniýkov peshine kómir tozańyn jetkizýdiń jańa júiesin engizý qarastyrylýda. Joba shikizatty óńdeýdiń tehnologiialyq turaqtylyǵy men qaýipsizdigin arttyrýǵa baǵyttalǵan.
Sapar qorytyndysynda Rýslan Óskenáli Balqash óndiristik alańynyń odan ári damýy úshin óndiristik bazany jetildirý, kásiporyndardyń turaqtylyǵyn saqtaý jáne qaýipsiz eńbek jaǵdaiyn jasaý negizgi baǵyt bolyp qala beretinin atap ótti.
