Balqash JEO-ny jóndeýge bólingen 708 mln teńge jymqyrylǵan

"Balqash Jylý" JShS direktorynyń burynǵy orynbasary jáne kásiporynnyń bas býhgalteri biýdjet qarajatyn urlaǵany úshin sottaldy, dep habarlaidy "Ult aqparat" QMA baspasóz qyzmetine silteme jasap.

Atalǵan azamattarǵa qatysty qylmystyq isti QR Qarjylyq monitoringi agenttigi tergep-tekserdi. 

Sottalǵan azamattar 2020 jylǵy maýsym men 2023 jylǵy qańtar aralyǵynda Balqash JEO men Balqash qalasyn jylýmen jabdyqtaý jelilerin jóndeýge jáne jumysyn úzdiksiz qamtamasyz etýge arnalǵan biýdjet qarajatyn is júzinde qandai da bir azamattyq-quqyqtyq mámileler jasalmaǵan jalǵan kásiporyndardyń shottaryna negizsiz aýdarý jolymen urlaǵan.

Jalpy somasy 708 mln teńge bolatyn urlanǵan qarajat ony paidalanýdan kiris alý úshin jyljymaityn múlikpen mámileler jasaý arqyly zańdastyryldy.

Tergeý barysynda kúdiktiler 144 mln teńgeni aqshalai qaitardy.

Kináli adamdardy sot 5,5 jyl jáne 5 jyl bas bostandyǵynan aiyrdy. Sot úkimi zańdy kúshine engen joq.

Memleket kirisine 3 bólmeli páter men Lexus avtokóligi tárkilendi.