Balqash kóliniń aýmaǵy Qazaqstanda týrizmdi damytý baǵdarlamasyna endi, dep habarlaidy "Ult aqparat".
Bul taiaý jyldary kýrorttyq aimaqty barlyq yqtimal tásildermen jaqsarta túsedi degendi bildiredi. Jaǵalaýda 20-dan astam demalys aimaǵyn salý, injenerlik jeliler júrgizý, Qaraǵandy-Balqash trassasyn jóndeý jumystaryn aiaqtaý jáne elimizdiń basqa óńirlerinen úlken ushaqtar qabyldaý úshin qala áýejaiyn qaita jańartý josparda bar.
Jaǵalaýdy abattandyrý qalai júrip jatqany týraly Balqash qalasynyń ákimi Oraz Táýirbekov áńgimelep berdi.
«Qazir biz úshin ekonomikalyq ósimniń negizgi núktesi - Shubar-Túbek jáne Torańǵylyq kentteri. Demalys úilerin salýǵa bolatyn 20,5 shaqyrym bos jaǵalaý bar. Biz úshin negizgi mindet - kentterdi sýmen jabdyqtaý, sý burý, elektr energiiasyn berý sekildi injenerlik jelilerdi júrgizý bolyp tabylady. Joba daiyn, memlekettik saraptama sheshimin kútemiz. Ol daiyn bolǵanda ǵana merdigerdi anyqtap, jumysqa kirise alamyz, - deidi Balqash ákimi.
Onyń aitýynsha, bul sharalar aimaqtyń investitsiialyq tartymdylyǵyn arttyrady jáne birden birneshe máseleni sheshedi. Olardyń biri - kýrorttyq aimaqtarda demalýdyń joǵary baǵasy jáne servis deńgeiiniń tómendigi.
«Bul kentterde káriz de, ortalyqtandyrylǵan sý qubyry da bolǵan joq. Árine, ol jerde demalys aimaǵyn ashý úshin kásipker bárin ózi qamtamasyz etýi tiis edi. Bul onyń qyzmetteriniń qymbattaýyna alyp keldi. Sondai-aq, elektr energiiasynyń baǵasyna aýyldyq tarif áser etti, ol qaladaǵyǵa qaraǵanda joǵary. Sondai-aq qoqys shyǵarý quny da bar, sebebi kentterdiń janynda poligondar joq. Qazir biz bul máseleni sheshemiz. Shubar-túbek jáne Torańǵylyq kentterin Balqash qalasyna qosý protsesi bastaldy. Tek Úkimettiń maquldaýyn kútemiz, - dedi Oraz Táýirbekov.
Osyndai biriktirý sharalarynan keiin osy eldi mekenderde kommýnaldyq qyzmetterge tarifter tómendeýi tiis. Jer satý boiynsha aýktsiondaryn ótkizý de ońai bolady. Olardyń birinshisi osy aida ótedi.
Balqash qalasynda jol qurylysy belsendi júredi. Týristerdiń negizgi aǵyny kýrorttyq aimaqqa jerústi kólikterimen keledi, sondyqtan munda jaqsy jol infraqurylymyn qurý basymdyqqa ie.
«Jol jóndeý jumystary eki kezeń boiynsha júrip jatyr. Qazir Shubar-túbek aýylynyń jol jelisi jóndelýde. Munda ishki kenttik joldy ortasha jóndeý júrgiziledi. Onda negizgi jumystar aiaqtaldy. «Rif« demalys aimaǵyna 300 metr asfalt salý, jaiaý júrginshiler ótkelderi men jasandy tegis emes joldar salý qaldy. Sodan keiin Torańǵalyqta joldardy jóndeýge kirisemiz. Onda respýblikalyq trassadan bastap kentishilik jolǵa deiin 8 shaqyrym joldy jóndeimiz. Maýsym aiynyń sońyna deiin aiaqtaýdy josparlap otyrmyz», - deidi Balqash ákimi.
Elimizdiń basqa óńirlerinen týrister aǵynyn tartý úshin áýe qatynasyn da damytý josparlanyp otyr. Qazir Balqash áýejaiy Iak-40 siiaqty shaǵyn ushaqtardy qabyldai alady. Kýrort qalasynda Boingter qonýy úshin áýe ailaǵy kúrdeli jóndeýden ótýi qajet. Aldyn ala esepteý boiynsha, buǵan 2,5 mlrd teńge shyǵyndalady.
Qaita qurý jobasyn QR Premer-Ministri Asqar Maminge usyndy. Qazir aerovokzal «Qazaqmys» korporatsiiasyna tiesili. Jóndeýdi biýdjetten qarjylandyrý úshin ony qalanyń kommýnaldyq menshigine berý qajet. Korporatsiia basshylyǵy oǵan óz kelisimin berdi.
Jaǵalaýdaǵy aýmaqty abattandyrý, injenerlik jeliler qurylysy, joldardy jóndeý jáne áýejaidy qaita jańartý jumystary 2023 jyly aiaqtalady. Aldyn ala boljam boiynsha, bul Balqashtaǵy týrister aǵynyn 5 esege arttyrýǵa múmkindik beredi. Qazir kýrort jylyna 80 myń adamdy qabyldaidy. Qaita jańǵyrtýdan keiin demalýshylar sany 400-500 myńǵa deiin ósýi múmkin.
