Aýyl sharýashylyǵy ministrligi Almaty oblysynyń Balqash aýdanyna qarasty Balatopar aýylynda mal jappai qyryldy degen aqparat shyndyqqa sáikes kelmeitinin habarlady.
8-tamyz kúni Aýyl sharýashylyǵy ministriniń mindetin atqarýshy Erbol Qarashókeevtiń tapsyrmasy boiynsha Almaty oblysy Balqash aýdany Balatopar aýyldyq okrýgine ministrlik qyzmetkerleriniń jumys toby jiberildi, dep habarlaidy ministrliktiń baspasóz qyzmeti.
Olar jergilikti turǵyndarmen jáne sharýa qojalyqtarynyń basshylarymen kezdesti. Kezdesý barysynda jergilikti turǵyndar maldyń jappai qyrylǵanyn rastaǵan joq jáne mal azyǵy tapshylyǵy týraly aqparatty joqqa shyǵardy.
Turǵyndardyń aitýynsha, shabyndyq jerdiń shóbi maldy qystan alyp shyǵýǵa tolyq jetedi. Budan bólek, Balatopar aýylynan 25-30 km qashyqtyqta ornalasqan Balqash kóliniń jaǵasynan qosymsha mal azyǵyn daiyndaýǵa bolady.
Sonymen qatar, ministrlik ókilderi jeti adamnan turatyn brigada traktorlarymen shópti shaýyp, jinap jatqan Topar jáne Jeltorańǵy aýyldarynyń shabyndyq jerlerin aralady.
Jalpy, Balatopar aýyldyq okrýgi men Balqash aýdany aýmaǵynda qurǵaqshylyq joq. Onymen qosa, shabyndyq jerler Jambyl jáne Ile aýdandarynyń fermerlerine, sondai-aq Jambyl oblysynyń kórshiles aýdandaryna beriledi.
Balatopar aýylynda jáne jalpy Balqash aýdanynda qurǵaqshylyq saldarynan mal qyryldy, jem-shóp tapshy degen aqparat jalǵan.
Buqaralyq aqparat quraldarynda jariialanǵan maldyń jappai qyrylýy týraly aqparat shyndyqqa janaspaidy jáne oǵan eshqandai negiz joq.
