Foto: Instagram/balgynbek_imash
Aitysker-aqyn Balǵynbek Imash bas múfti Naýryzbai Taǵanulynyń qyzmetinen ketýin talap etti. Bul oiyn ol Instagram-paraqshasynda bólisti, - dep habarlaidy "Ult aqparat".
Onyń aitýynsha, bas múfti "Arýaq qoldasyn" degen túsinikke qatysty eki túrli pikir bildirgen.
"Qazirgi dini jaǵdailarǵa bailanysty jaq ashpaý kúná bolatyny anyq. Áýelde emotsiiaǵa salynyp, artyq aityp qoimaý úshin úndemei, áliptiń artyn baqtym. Biraq bizdiń qoǵam bas múftidiń aiybyn ashyp aitý bylai tursyn, molda bitken aqtap álek. Din tizginin qolyna alǵan Naýryzbai Taǵanuly "Arýaq qoldasyn" degen túsinikke qatysty az ýaqyt ishinde eki túrli pikir bildirdi.
Áýelde bul sóz shariǵat sheńberine syimaitynyn aitty. Keiin "dinimizde oǵan negiz bar, shariǵatqa qaishy emes" dedi. Allanyń qaharyna ushyratatyn sóz. Óitkeni Allanyń keshirmeitin kúnási ol - Allaǵa Serik qosý!
Allamen qatar qandai zattan bolsyn jaqsylyq kútý, pana tileý, járdem suraý - dinnen shyǵaratyn, eń aýyr kúná! Araq ishýden de, zina jasaýdan da, ósimqorlyqtan da, kisi óltirýden de aýyr!" - dep jazdy ol.
Aitysker-aqyn QMDB imamdarynyń múftidiń sózi men ózin aqtap jatqanyna qynjyldy.
"Búkil QMDB imamdarynyń múftidiń sózi men ózin aqtap, qorǵap, jantalasyp jatqany - óte úlken qasiret!
Arýaqqa syiynýdy - shapaǵat dep, óliniń duǵasy dep, taýassýl dep, ihsan dep túrli qisynmen aqtap jatqany mýftidiń sózinen de jiirkenishti! Bular kúpirdiń eń úlkeni Allaǵa serik qosýdy qoldap, aqtap, qorǵap jatyr. Mýfti ol sózdi túrli sebeppen aitýy múmkin. Al múftidiń aitqanyn túzep, túrli qisynmen aqtap álek bolǵandardyń áreketine qandai sebep bar? Nazarbaev jaman emes degenniń bárin "nurbot" degen siiaqty "Arýaqqa syiynýǵa bolmaidy" degenniń bárin "ýahabi" dep bir shtamp soǵa salatyn ádet bar.
Meniń ustanymym - eshqandai sáláfilik-ýahabilik ustanym emes, ákemniń aityp ketken ósieti. “Balam, biz kommýnist boldyq. Sender tek Allaǵa syiynyńdar. Jaratýshy jalǵyz hám kúshti! Jaratylǵan kóp hám álsiz! Kóp ári álsizge jalbarynǵan jaqsy ma, jalǵyz ári kúshtige jalbarynǵan jaqsy ma? Alla bárine qudiretti ári jetkilikti. Eger arýaqtan kómek surasań - Allaǵa zulymdyq jasaǵanyń. Ony álsiz ári jetkiliksiz sanaǵanyń,” - dep ósiet aityp ketken.
Men 30 jyl tárbie alǵan imamdarymnyń ishinde “arýaqqa syiynýǵa bolady” degen bir de bir imam bolmaǵan. Men estigen hadis, men oqyp júrgen quran tek taýhidke shaqyrady.
Men Islam dinin ustanǵan qarapaiym musylman retinde Bas Mýftidiń aitqan sózine jaýap berýin, Allaǵa táýbe jasaýyn, jamaǵattan keshirim suraýyn, jáne óz erkimen qyzmetinen ketýin talap etemin!", - dep jazdy Balǵynbek Imash
