«Baldáýren» Respýblikalyq oqý-saýyqtyrý ortalyǵynda «Rýhani jańǵyrý» baǵdarlamasyn iske asyrý aiasynda 2019 jyldyń 13 aýysymy «Atanyń sózi-aqyldyń kózi» jas tarihshylar men geograftardyń Respýblikalyq kezdesýiniń ashylý saltanaty ótti.
Iá, atalar sózi — keshegi ótken qariialardan, ǵulama oishyldar men sheshen-bilerden, aqyn-jyraýlar men sal-serilerden mura, miras bolyp qalǵan uly tárbie quraly ekeni belgili. Desek te, búgingi saltanatty ashylý rásiminde qoiylǵan sahnalyq qoiylym myń jylda bir-aq kórinetin kometalardai syry da, sezimi de tereń, tuńǵiyq dana tulǵalarymyzdyń kórinisterimen erekshelendi.
Kórermenniń jan-dúniesin tebirentip, rýhani bailyqqa keneltken aitýly is-shara qatysýshylarymyzdyń boiyna Otanǵa, Týǵan jerge degen súiispenshiligin arttyryp, tamyry tereń tarihymyzǵa qaita úńildirgendei.
Aýysymnyń ashylý saltanatynda «Baldáýren» oqý-saýyqtyrý ortalyǵynyń Bas direktorynyń mindetin atqarýshy Qýat Qaiyruly Nurmuhanov sóz sóilep, elimizdiń túkpir-túkpirinen jinalǵan balalardy aýysymnyń ashylýymen quttyqtap, olarǵa daryndy da tapqyr, bilimdi de bilgir bolýlaryna, tarihymyzdy jalǵaityn «Máńgilik eldiń» myzǵymas ulandary bolýǵa tilek bildirdi.
Aita ketsek, «Baldáýren» Respýblikalyq oqý-saýyqtyrý ortalyǵy Nlbasy N.Á.Nazarbaevtyń tapsyrmasy boiynsha «Artek» Halyqaralyq balalar ortalyǵy negizinde qurylǵan.
«Baldáýren» respýblikalyq ǵylymi-ádistemelik, saýyǵý jáne oqý-pedagogikalyq uiymdastyrý ortalyǵy – balalardyń halyqaralyq jáne respýblikalyq mádeni kópshilik, ǵylymi–praktikalyq is-sharalaryn ótkizetin respýblikalyq ortalyq. «Baldáýren» ROSO elimizdiń eń kórikti jerleriniń biri Býrabai kýrorty aimaǵynda Shýche kóliniń jaǵasynda ornalasqan.
