Búgin aldyn ala sot otyrysynda balasynyń basynan taspen urǵan ákeniń ómir boiy bas bostandyǵynan aiyrylýy múmkin ekendigi belgili boldy, dep habarlaidy QazAqparat tilshisi.
«2018 jyly 16 shildede Brianskaia kóshesinde Asqaroǵly Murat dármensiz tulǵaǵa qylmys jasaǵan. Ol QR QK 24-babynyń 3-bólimimen, 99-babynyń 2-bóliminiń 3-tarmaǵymen aiyptalyp otyr. Bul asa aýyr qylmysqa jatady. Mundai qylmys jasaǵan adam ómir boiy bas bostandyǵynan aiyrylyp nemese ólim jazasyna kesilýi múmkin», - dedi memlekettik aiyptaýshy.
34 jastaǵy Murat Asqaroǵly bul málimdemege birden qarsylyq bildirdi.
«Men mundai soraqy qylmys jasaǵan joqpyn. Meni balama qol kótersin dep tárbielegen joq», - dedi ol.
Sonymen qatar sottalýshy men onyń qorǵaýshysy qylmystyq isti qylmystyq isti qaraýǵa alqa biler soty qatysýyn surady.
Odan bólek sottalýshyny bultartpaý sharasyn ózgertip, sot aiaqtalǵansha Murat Asqaroǵlyn úiine jibere turýǵa ótinish aityldy.
«Men óz otbasym men bala-shaǵamnan qashyp ketedi dep oilaisyzdar ma? Meni bosatyńyzdarshy, ótinemin!» - dep aiqailady Murat Asqaroǵly.
Eske sala keteiik, qaiǵyly oqiǵa byltyr 16 shilde kúni Odesskaia men Brianskaia kósheleriniń qiylysynda bolǵan. Turǵyndar tal túbinen 4,5 jasar balany taýyp alǵan. Bala shala-jansar kúiinde shuǵyl aýrýhanaǵa jetkizilip, ota jasaldy. Almaty politsiiasy jantúrshigerlik oqiǵaǵa kúdikti retinde balanyń ákesin ustady. Murat Asqaroǵly óziniń kinásin moiyndap, qazaqstandyqtardan keshirim suraǵan bolatyn.
Er adam mastyqtan eseńgirep turǵanda balasynyń qyńqyl-syńqylyn kótere almai, taspen samaiynan bir-aq urǵanyn aitqan. Qalalyq mamandandyrylǵan qylmystyq sot Murat Asqaroǵlyn QR QK 24-babynyń 3-bólimi jáne 99-babynyń 2-bólimi boiynsha qamaýǵa aldy.
