Kinoteatrlardyń jáne barlyq telearnalardaǵy balalar mýltfilmderiniń tilin qazaqshaǵa kóshiretin ýaqyt jetti. Bul týraly «Uly dalanyń ultaralyq tili» respýblikalyq forýmynda elordadaǵy «Bereginia» orys etnomádeni ortalyǵy» qoǵamdyq birlestiginiń múshesi Elizaveta Sedysheva aitty, dep habarlaidy QazAqparat.
«Men taǵdyrdyń jazýymen Temirtaý qalasyndaǵy balalar úiinde tárbielenip, qazaqtyń tilimen qatar, kórkem dástúrine qanyp óstim. Árkez qasymnan tabylatyn dostarymdy da qazaq ortasynan taptym. Dostarym qazaq bolǵan soń únemi sózdik qorymdy baiytyp, bilim kókjiegin keńeitýge tyrysamyn. Osy jerde týyp, osy eldiń azamaty bolǵandyqtan, tildi bilmeý – men úshin ardyń isi. QR Prezidenti qazaq tili ultaralyq qatynas tiline ainalýy kerektigin jii aitady. Tildi damytý árqaisysymyzdyń tikelei mindetimiz. Til – eń aldymen halqymyzdyń tarihynyń, mádenietiniń ainasy. Al, memleketimizge qyzmet etetin azamattar osy qundylyǵymyzdy qasterlese – elimiz ary qarai qaryshtap dami túsetini sózsiz», - deidi Elizaveta Sedysheva.
Ol memlekettik tildiń imidjin arttyrý maqsatynda jastar arasynda qazaqsha sóileýge shaqyratyn pikir alańdaryn, osyndai forýmdar, túrli aktsiialar jii uiymdastyrylsa degen tilegin aitty.
«Kinoteatrlardyń jáne barlyq telearnalardaǵy balalar mýltfilmderdiń tilin qazaqshaǵa kóshiretin ýaqyt jetti. Qazir ata-analardyń jumysbastylyǵyna bailanysty balalardy mýltfilmder tárbieleitin boldy. Eshkim úiretpese de balabaqsha búldirshinderi orys, aǵylshyn tilderin meńgerip alady. Kerisinshe óz ana-tiline kelgende sóilei almaidy, sebebi olardyń qazaqsha tanym-túsinigin qalyptastyratyn orta joq, adam joq, ata-ana , ata-áje joq. Bizdiń bolashaq balalarymyzdyń tili qazaqsha shyǵýy tiis. Sondyqtan eń aldymen teledidar tilin memlekettik tilge 100 paiyz kóshirýimiz kerek dep esepteimin», - deidi ol.
