Almaty qalalyq bilim basqarmasynyń basshysy Gúlnár Qojabergenova balany mektepke 6 nemese 7 jasynan bastap jiberý týraly suraqqa jaýap berdi, dep habarlaidy QazAqparat tilshisi.
«Qańtarda Qazaqstan Respýblikasyndaǵy bilim týraly zańǵa aǵymdaǵy jyldan bastap 6 jasqa deiingi balalar mektepterge qabyldanady degen ózgertý engizildi. Buryn 6-dan 7-ge deiin dep jazylǵan bolatyn. Ata-analar ózderi biletin. Balasyn 6 nemese 7 jasta mektepke beretin. Zańǵa túzetýler jyldyń ortasynda engizildi, ata-analar daiyn bolmady, balalaryn daiyndamady. Sondyqtan,biylǵy jyly olar tańdaý quqyǵyna ie: balany berý-bermeý týraly sheshimdi ózderi qabyldaidy. Biraq, aǵymdaǵy jyldyń 1 qyrkúieginde bala 6 jasta bolsa, ol mektepke barýy kerek, sebebi baǵdarlama 6 jasar balaǵa arnap daiyndalǵan. Biyl biz ata-analarǵa tańdaý quqyǵyn beremiz», - dedi Gúlnár Qojabergenova brifingte.
Alaida ol, ata-analar balalaryn mektepke 6 jastan jiberý kerek dep atap ótti. Sebebi, 12 jyldyq bilim berýge birtindep kóshý bastaldy. Bilim basshysy 6 jasynda balasyn mektepke jibermegen ata-analarǵa eshqandai shara qoldanylmaitynyn basa aitty.
«Ata-analardyń bala baǵdarlamany igerip kete almaidy deýine negiz joq. Baǵdarlama 6 jasar balaǵa arnalǵan», - dep túiindedi bilim basqarmasynyń basshysy.
