Foto: videodan kadr
Jambyl oblysynda kámeletke tolmaǵan balany soqqyǵa jyǵý deregi boiynsha quqyq qorǵaý organdary tergeý júrgizip jatyr, dep habarlaidy Ult.kz.
Aldyn ala málimetke sáikes, Taraz qalasynyń turǵyny óz ulyn burynǵy jubaiynan kek alý maqsatynda uryp-soǵyp, bul áreketti videoǵa túsirgen.
Oqiǵa barysynda áiel balasyn urýǵa ekinshi kámeletke tolmaǵan balany da májbúrlegeni belgili boldy. Qazirgi ýaqytta jábirlenýshi balaǵa sot-meditsinalyq saraptama taǵaiyndalyp, densaýlyǵyna keltirilgen ziiannyń aýyrlyq dárejesi anyqtalýda.
Bala quqyqtary jónindegi ýákil Dinara Zákieva bul derek boiynsha málimet ótken aptada túskenin rastady. Onyń aitýynsha, atalǵan fakti boiynsha qylmystyq is qozǵalyp, balalar qaýipsizdigi úshin arnaiy mekemege ornalastyrylǵan.
«Ótken aptada Jambyl oblysynda ananyń balasyn soqqyǵa jyqqany týraly habar tústi. Qylmystyq is qozǵaldy. Balalar mekemege ornalastyryldy», – dep jazdy ombýdsmen áleýmettik jelidegi paraqshasynda.
Atalǵan jaǵdaiǵa bailanysty QR Oqý-aǵartý ministrliginiń Balalardyń quqyqtaryn qorǵaý komiteti de pikir bildirdi. Vedomstvo málimetinshe, sotqa deiingi tergep-tekserý bastalyp, qajetti saraptamalar taǵaiyndalǵan. Balalar Qamqorlyq úiine ornalastyrylyp, olarǵa meditsinalyq kómek kórsetilgen, qazirgi jaǵdailary turaqty.
Komitet ókilderi balalarǵa qatygezdik kórsetýge jol berilmeitinin atap ótip, kináli tulǵalar zań aiasynda jaýapkershilikke tartylatynyn málimdedi. Sonymen qatar ata-ana quqyǵynan aiyrý máselesi kámeletke tolmaǵandar isteri jáne olardyń quqyqtaryn qorǵaý jónindegi komissiia otyrysynda qaralatyn bolady.
