Oramal máselesi búgin ǵana bolyp otyrǵan joq qoi. Eger qazir sheshilmese ári qarai úlken máselege ainalady. 6 jasar qyzdy oramalmen qaptap mektepke jiberýdiń logikasyn uǵyna almai-aq qoidym. Dál sol qyzdaryn mektepke oramalmen jiberetin ata-analar - baryp turǵan egoist hám balalaryn esh oilaǵysy kelmeitin adamdar dep esepteimin. Ózińiz oilap qarańyz, búkil mekteptegi qyzdardyń shashy ashyq júredi. Olardyń kóbi dini máselelerden habary da joq. Synypqa basy oranǵan ózderimen qatar qyz kirip keledi. Ne isteidi ol balalar? Árine, ol oramaldy qyzdan alys júretin bolady. Onyń ústine úiine baryp bolǵan jaǵdaidy aitsa, kádimgi qyzdardyń áke-shesheleri "Oibai, jolama ondailarǵa" deidi. Nátijesinde, endi ǵana mektepte barǵan kishkentai qyz qoǵamnan oqshaýlanyp, ózin bóten sezinip depressiiaǵa ushyrai bastaidy. Al, ol kezeń balalardyń qalyptasý kezeńi ekenin eskersek, álgi qyzdyń bolashaǵy qandai bolaryn oilai berińiz. Ol qyz bolashaqta eshkimmen aralaspaityn bolady. Eseigen kezde qoǵam ony qabyldaǵanymen, balanyń sanasynda qalyp ketken kompleks pen renishtiń sońy nege aparatynyn eseptei kórińiz...
Medresede oqyp shyqqan soń, eseie kele kópshilik synyptastarymyzben jolyǵyp kórdik. Sonyń barlyǵy da kezinde maksimým taqýalyqqa umtylǵan jastar edi. Biraq, sol qysymnan shyqqan boida bári ózgerdi. Sizderge aitaiyn, úlken ómirge qadam basqan kezde, sol kezeńdegi dindar balalardyń ishindegi qysym kórip óskenderi eń "qýyp ketetinderdiń" qatarynda bolady. Kádimgi jastar jasaýy múmkin kúnálárdi on eselep jasap, ishtei jarylady. Eshkim óz balasyna zorlap din qabyldatýǵa qaqysy joq. Din ár adamnyń aqyly tolysyp, sanaly túrde qabyldaýy iaki qabyldamaýy tiis nárse bolýy kerek.
Sondyqtan, mektepke oramalsyz kirgizý - memlekettiń qylmysy emes. Mektepke oramalmen jiberý - ata-ananyń qylmysy. Hám ol úshin jaýap berýi tiis sol ata-analar.
Árine, barlyǵymyz urpaqtarymyzdyń bolashaǵy jarqyn bolýyn hám adami qalyptan taimas izgi jandar bolyp qalyptasýyn qalaimyz. Degenmen, tárbie degen bir tutam oramalmen berilmeidi. Ol adamnyń sanasynda beriletin/qalyptasatyn ekosistema. Ózderi áli ómir kórmei, bolmysy jai ǵana dini romantikaǵa ushyraǵan ata-ananyń aqymaqtyǵynan jas balalardyń ómiri buzylmasyn!
