Almaty oblysynda bilim oshaqtaryna investitsiia tartý qarqyndy júrip jatyr. Bul týraly óńir ortalyǵy – Taldyqorǵan qalasynda ótken «Balalyq shaqqa investitsiia» atty mektepke deiingi bilim berýdegi investorlardyń I oblystyq forýmda aityldy.
Sharany Qazaqstan mektepke deiingi bilim uiymdary qaýymdastyǵynyń filialy, Almaty oblysy ákimdigi men oblystyq kásipkerler palatasy jáne isker áielder keńesi uiymdastyrdy. Oǵan memlekettik-jekemenshik áriptestik ortalyǵy, “Damý” qorynyń jáne jekemenshik balabaqsha ókilderi qatysty.
Keleli kezdesý eki sessiiany qamtyp, birinshi sessiiaǵa oblystyq kásipkerler palatasynyń direktory Nariman Ábilshaiyqov moderatorlyq etti. Osy barysta «Atameken» UKP Áleýmettik sala jáne áleýmettik seriktestik komitetiniń tóraǵasy Talǵat Doskenov, Qazaqstan mektepke deiingi bilim uiymdary qaýymdastyǵynyń prezidenti Leila Kúlenova, oblys ákiminiń orynbasary Jaqsylyq Omar baiandama oqyp, óńirimizdegi jekemenshik mektepke deiingi bilim berý uiymdaryn damytýdyń múmkindikterin saralady.
Óz kezeginde Talǵat Doskenov jekemenshik bilim berý mekemeleriniń joǵary áleýmettik jaýapkershilikti arqalap otyrǵanyn jetkizdi. Sondai-aq, áleýmettik kásipkerlikti damytý mehanizmin damytýdyń joldaryn usyndy. Al Leila Kúlenova jekemenshik sektordyń memlekettik bilim berý júiesiniń balamasyna ainalǵanyna nazar aýdardy.
Túiindi máseleniń túiinshegi tarqatylǵan jiynda Jaqsylyq Omar óńirdegi mektepke deiingi bilim berý uiymdarynyń sany men sapasyna airyqsha toqtaldy.
– Táýelsizdik jyldarynda Almaty oblysynda mektepke deiingi bilim berý uiymdarynyń sany 47-den 1022-ge deiin ósti. Mektepaldy bilim berýmen qamtý 3,1%-dan 95,3%-ǵa deiin artty. Búginde balabaqshalarǵa barlyǵy 70 myńnan astam búldirshin barady. Osylaisha, oblysta memlekettik-jekemenshik áriptestikti damytýdyń nátijesinde jekemenshik balabaqshalar úlesi 70%-dy qurady. Sońǵy bir jylda Almaty oblysynyń jeke investorlary mektepke deiingi bilim berý salasyna 1,7 mlrd. teńge qarjy quidy, – dedi Jaqsylyq Muqashuly.
Qarjy demekshi, sońǵy jyldary atalǵan salaǵa qomaqty investitsiianyń baǵyttalýynyń da óz sebebi bar. Aita ketsek, 2011 jyly Elbasy Nursultan Nazarbaevtyń tapsyrmasymen «Balapan» baǵdarlamasy qabyldanǵan bolatyn. Osyndai tiimdi baǵdarlama negizinde biznes ókilderi birtindep bilim salasyna bet burdy. Sonyń nátijesinde, jekemenshik balabaqshalarǵa arnaiy qoldaý kórsetilip, olarǵa memlekettik tapsyrysty oryndaý úshin qarajat berildi.
Ol ol ma, balabaqsha ashý men onyń jumysyn jeńildetý úshin 2011 jyly mektepke deiingi uiymdardy litsenziialaý alynyp tastaldy. 2014 jyldan bastap jańa sanitarlyq-epidemiologiialyq talaptar qabyldandy. Sonymen qatar, bilim berý uiymdary úshin kiris salyǵy alynyp tastaldy. Mine, mundai igi sharalar óńirdegi balabaqshalardyń kóptep ashylýyna muryndyq bolǵany ras.
Osy oraida, oblys ákiminiń orynbasary óńir ortalyǵynda balabaqshalardyń kóptep salynyp jatqanyn, bul kórsetkishtiń ázirge sanmen ǵana erekshelenip turǵanyn aita kelip, endigi jerde bóbekjailardyń sapalyq deńgeiin kóterý mindeti turǵanyn da atap ótti.
Qozybai QURMAN,
Almaty oblysy
