Almaty oblysy Talǵar aýdany Tuzdybastaý aýyly ákimdiginiń ǵimaratyna baryp, kir kiimderin jýǵan áieldiń videosy jelide qyzý talqyǵa tústi, dep habarlaidy Ulysmedia.kz.
Jelide taraǵan videodan kishkentai búldirshinderin ertken áieldiń ákimdikke dorba-dorba kir kiimderin arqalap ákelip, ǵimarattyń bir buryshynda jýyp otyrǵanyn kórýge bolady.
Áiel osy is-áreketi arqyly Talǵar aýdanyndaǵy sý tapshylyǵy problemasyna nazar aýdartýdy kózdegen. Ol tek kir jýyp qana qoimai, smartfonyna ne bolyp jatqanyn túsirip otyr.
Talǵar aýdanyndaǵy taǵy bir aýyl – Belbulaq turǵyndary da bes kún boiy sýsyz otyrǵandaryn aityp shaǵymdandy.
"Búgin 25 shilde, saǵat kúndizgi 12, Gorkii kóshesi. Sý áli joq. Kúndiz de, túnde de joq. Jýylmaǵan ydys úiilip tur. Buryn tym bolmaǵanda túnde aǵatyn, bótelkelerge toltyryp alatynbyz. Qazir múldem toqtap qaldy. Ákimdikke suraǵym bar: meniń úsh balam bar, kishkentaiym 1,5 jasta, men myna ystyq kúnde olardy qashanǵy shomyldyrmai otyramyn? Qashanǵy olardyń bet-aýzyn dymqyl shúberekpen súrtemin?" - deidi Belbulaq aýylynyń turǵyny.
