sýret ashyq derekkózden alyndy
Almatyda jas kelinshek ózine qol jumsady. «Mamyr» shaǵynaýdanynda bolǵan qaiǵyly oqiǵa týraly shahar turǵyny, qoǵam belsendisi Jibek Ámenova áleýmettik jelidegi paraqshasynda habarlady.
«Dereý #Nemolchi qory men quqyq qorǵaýshylardyń telefon nómirleri kerek…
Sóz joq... Búgin meniń kórshim, jas, sulý kelinshek, úsh balanyń anasy páterinde balalarynyń kózinshe asylyp qaldy... Qashanǵa deiin jas kelinshekter óz-ózderine qol jumsai beredi?! Oǵan balalary da arasha bola almai qaldy.
Úidiń turǵyndary men kórshilerdiń aitýynsha, ol turmystyq zorlyq-zombylyqqa jii ushyraǵan... Men muny rastai almaimyn. Anyǵyn tergeý anyqtaidy. Alaida adam tekten-tekke óz-ózine qol jumsamaidy ǵoi.
Qalai desek te, men bul jaǵdaidy baqylaýǵa alyp, tolyq tergeý amaldaryn júrgizýdi talap etemin.
Islamda súiip qosylǵan jaryńdy syilap, ony qadirleý – Alla taǵalanyń buiryqtarynyń biri emes pe?!», – dep jazdy ol Facebook-tegi paraqshasynda.
Almaty politsiiasy bul derek QR Qylmystyq kodeksiniń 105-baby «Ózin-ózi óltirýge deiin jetkizý» boiynsha sotaldy tergeýdiń biryńǵai tizilimine tirkelgenin málimdedi.
«Áýezov aýdandyq politsiia basqarmasyna qarasty politsiia bóliminiń qyzmetkerleri 1994 jyly týǵan B-nyń óliminiń sebepteri men mán-jaiyn anyqtaýǵa baǵyttalǵan keshendi jedel-izdestirý sharalaryn júrgizip jatyr. Qylmystyq is boiynsha QR QPK-niń 201-babyna sáikes ózge aqparat tergeý múddesine orai jariialanbaidy», - dedi vedomstvo ókilderi.
