Kámeletke tolmaǵandarǵa seksýaldy qylmys jasap, jazasyn ótegennen keiin bas bostandyǵynan aiyrý oryndarynan bosatylǵan kezde olardy ákimshilik turǵyda qadaǵalaý týraly zańnamalyq túzetýler kesheni ázirlendi, dep habarlaidy "Ult aqparat".
Aita ketsek, Memleket basshysy 2020 jyldyń 1 qyrkúieginde «Jańa jaǵdaidaǵy Qazaqstan: is-qimyl kezeńi» Joldaýyn jariialaǵan bolatyn.
Osy Joldaýdaǵy mindetterdi oryndaý maqsatynda «QR keibir zańnamalyq aktilerine jekelegen erejelerin iske asyrý máselesi boiynsha ózgerister men tolyqtyrýlar engizý týraly zań jobasy ázirlengen.
Qujatty Májiliste birinshi oqylymda QR Memlekettik qyzmet isteri agenttiginiń tóraiymy Anar Jaiylǵanova oqydy.
«Jalpyulttyq jospardyń 64-shi tarmaǵy boiynsha kámeletke tolmaǵandarǵa jasalǵan seksýaldy sipattaǵy qylmys úshin jazany qataitý qarastyrylǵan. Osy tarmaq boiynsha qylmystyq jáne qylmystyq-protsessýaldyq kodeksterge bas bostandyǵynan aiyrý oryndarynan bosatylǵan adamdardy ákimshilik qadaǵalaý týraly zańnamalyq túzetýlerdiń kesheni ázirlendi», - deidi Anar Jaiylǵanova.
Agenttik basshysynyń aitýynsha, bul túzetýler birshama tapsyrmany iske asyrýǵa baǵyttalǵan.
«Kámeletke tolmaǵandarǵa qatysty seksýaldy sipattaǵy qylmystar úshin jazany kúsheitý, pedofilderdi qylmystyq atqarý júiesiniń qaýipsizdigi barynsha joǵary mekemelerinde ustaýdy belgileý, olarǵa raqymshylyq jasaýdy jáne merziminen buryn boldyrmaý kózdeledi», - dedi ol.
Anar Jaiylǵanova ázirlegen túzetýler myna erejelerden turady. Birinshiden Qylmystyq kodekste kámeletke tolmaǵandarǵa qatysty jynystyq qylmystardy jasaǵany úshin sanktsiialar kúsheitilgen. Ekinshiden, mundai qylmystarǵa jasaǵandar úshin belgili bir laýazymdy atqarýǵa ómir boiy tyiym salý kózdelgen.
