Foto:elements.envato.com
Úkimet Memleket basshysynyń 1 qyrkúiekte Qazaqstan halqyna Joldaýynda jariialaǵan tapsyrmalaryn oryndaý jónindegi Ulttyq is-sharalar josparyn bekitti, - dep habarlaidy Tengrinews.kz.
Úkimet otyrysynda jospardyń egjei-tegjeiin ulttyq ekonomika ministri Álibek Qýantyrov aityp berdi.
Onyń aitýynsha, kommýnaldyq kásiporyndardyń investitsiialyq tartymdylyǵyn arttyrý maqsatynda monopoliialyq jáne oligopoliialyq naryqtardy qospaǵanda, baǵalar men tarifterdi memlekettik retteýden kezeń-kezeńimen bas tartý jóninde usynystar ázirlenedi.
2024 jylǵy 1 qańtardan bastap balalardyń arnaiy jinaqtaýshy shottaryna Ulttyq qordyń jyl saiynǵy investitsiialyq kirisiniń 50 paiyz merziminen buryn alý quqyǵynsyz, keiinnen olardy turǵyn úi satyp alýǵa jáne bilim alýǵa paidalaný múmkindigimen aýdarýdy kózdeitin "Ulttyq qor – balalarǵa" jobasyn iske qosý josparlanǵan.
"Apatty jáne úsh aýysymdy mektepterdiń problemalaryn tolyq sheshý maqsatynda "Jaily mektep" jańa ulttyq jobasynyń sheńberinde 2025 jylǵa deiin 800 myń oqýshy ornyna arnalǵan mektepter salynady. Densaýlyq saqtaý salasynda elimizdiń aýyl turǵyndarynyń qajettilikterin qanaǵattandyrý maqsatynda "Aýyldyq densaýlyq saqtaýdy jańǵyrtý" ulttyq jobasy ázirlenip jatyr.
61 jasty belgilei otyryp, áielderdiń zeinetkerlik jasyn 2028 jylǵa deiin arttyrýǵa moratorii engizýdi jáne 2023 jylǵy birinshi qańtardan bastap bala kútimi boiynsha tólemder taǵaiyndaý kezeńiniń uzaqtyǵyn 1,5 jasqa deiin ulǵaitýdy kózdeitin zańnamalyq túzetýler qabyldanady.
Áleýmettik saqtandyrý júiesine qatysýshylar úshin jumysynan airylǵan kezdegi áleýmettik tólemderdiń mólsheri ortasha ailyq tabystyń 45 paiyzyna deiin ulǵaitylady", - delingen habarlamada.
Fiskaldyq retteýdi qaita júkteý maqsatynda 2023 jyly jańa Salyq kodeksiniń jobasy daiyndalady. Biýdjettik josparlaýdaǵy tóreshildikti odan ári qysqartý jáne biýdjetaralyq qatynastardy jetildirý úshin jańa Biýdjet kodeksi ázirlenedi.
Sondai-aq, ol memlekettik qyzmetshilerdi irikteý jáne bosatý júiesin qaita qaraý týraly habarlady. Memlekettik qyzmet isteri agenttigi tolyqqandy strategiialyq kadrlyq institýtqa ainalady.
Josparǵa quqyq qorǵaý máseleleri de engizilgen. Qýantyrov elimizde nashaqorlyqpen kúresýdiń baǵdarlamalyq qujaty ázirlenetinin, aýyr qylmys jasaǵandar úshin qylmystyq jaýapkershilik kúsheitilip, shartty túrde merziminen buryn bosatý alyp tastalatynyn atap ótti.
"Memleket basshysynyń Joldaýyn iske asyrý jónindegi Ulttyq is-sharalar josparynyń usynylǵan jobasy Memleket basshysy alǵa qoiǵan barlyq mindetti qamtidy. Barlyq memlekettik organdar men ákimdikter ony júzege asyrýǵa dereý kirisýi kerek. Memlekettik organdardyń birinshi basshylary jospardaǵy is-sharalardyń sapaly ári ýaqtyly oryndalýyn qamtamasyz etýi tiis", - dedi premer-ministr Álihan Smaiylov.
