Senattyń Áleýmettik-mádeni damý jáne ǵylym komitetinde Parlament depýtattarynyń bastamasymen ázirlengen «Qazaqstan Respýblikasynyń keibir zańnamalyq aktilerine inkliýzivti bilim berý máseleleri boiynsha ózgerister men tolyqtyrýlar engizý týraly» zań jobasy qaraldy, dep habarlaidy "Ult aqparat".
Zań jobasynda inkliýzivti jáne arnaiy bilim berýdiń normativtik quqyqtyq bazasyn jetildirý, sondai-aq elimizdiń zańnamasyn Adam quqyqtarynyń jalpyǵa birdei deklaratsiiasy jáne Múgedekterdiń quqyqtary týraly konventsiia qaǵidattaryna sáikes keltirý jónindegi mindetter sheshiletin bolady.
Osy zań qabyldanǵan kezde erekshe qajettilikteri bar balalardy oqytatyn uiymdar bilim berý baǵdarlamalaryn bilim alýshylar men tárbielenýshilerdiń jeke damý erekshelikterine jáne áleýetti múmkindikterine sáikes beiimdeýi tiis.
«Bizdiń elimizde erekshe bilim berý qajettilikteri bar 162 myńnan astam bala nemese balalardyń jalpy sanynyń 2,7%-y bilim berý protsesine erekshe kózqarasty talap etedi. Zań jobasy erekshe qajettilikteri bar adamdarǵa bilim berý salasyndaǵy negizgi normativtik-quqyqtyq akt bolyp sanalady jáne ony qabyldaý inkliýzivti bilim berýdi sapaly júzege asyrý úshin barlyq qajetti jaǵdailardy jasaýǵa múmkindik beredi», - dedi komitet hatshysy Nariman Tóreǵaliev.
