Balalardy vaktsinalaý qaýipsiz jáne tiimdi ekenin zertteýler kórsetti. Bul týraly Profilaktikalyq meditsina akademiiasynyń prezidenti Almaz Sharman aitty, dep habarlaidy QazAqparat.
«Biz balalar qoǵamnyń eń mobildi bóligi ekenin,olardyń eresektermen de, qurdastarymen de bailanys jasaitynyn, mektepke baratynyn, sondyqtan olardyń infektsiianyń tasymaldaýshy ekenin túsinýge tiispiz. Sondyqtan kóptegen elderde balalardy vaktsinalaý týraly sheshim qabyldandy. Eki myńnan astam balaǵa júrgizilgen klinikalyq zertteýler Pfizer vaktsinasynyń qaýipsiz jáne tiimdi ekenin kórsetti», - dedi Almaz Sharman.
Sonymen qatar, ol barlyq vaktsina immýnitetti ómir boiyn qalyptastyrmaitynyn, keibir infektsiialardan árbir bes, on jyl saiyn, al tumaý siiaqtylardan jyl saiyn egilý kerektigin eske saldy.
«Revaktsinatsiia degen osy. Keide «údetkish vaktsina» termini qoldanylady, iaǵni taǵy bir qosymsha. Ýaqyt óte kele vaktsinanyń áseri tómendeidi, onyń ústine, COVID-19-dyń jańa shtamdary paida bolady. Qaita egý jańa koronavirýs infektsisynyń barlyq shtamdarynan qorǵaý úshin antidenelerdiń jetkilikti deńgeiin qalyptastyrýǵa múmkindik beredi. Jaqynda Izrailde keń aýqymdy zertteý júrgizildi, bul vaktsinatsiiadan ótkenderdiń barlyq jas toptarynda, ásirese egde jastaǵy adamdarda immýndyq jaýap ýaqyt óte kele tómendegenin kórsetti. Sondyqtan ekpe saldyrǵan soń 6 aidan keiin revaktsinatsiiany usynatyn ǵylymi negizdeme bar», - dedi professor.
Onyń aitýynsha, ǵalymdar kross revaktsinatsiiany, iaǵni úshinshi vaktsinany basqa preparatpen alýdy usynady, biraq bul mindetti emes.
«Densaýlyq saqtaý ministrligi vaktsinalardy aralastyrýdy bir nusqa retinde qarastyrady. Aldynda saldyrǵan ekpemen qaita vaktsinalanýǵa bolatyndyǵyn eshkim joqqa shyǵarmaidy. Degenmen, men ózim túrli vaktsinalardy aralastyrý tiimdi bolady dep sanaimyn. Aralastyrý kezinde qandai da bir qarsy kórsetilimder bolǵan joq», - dedi ǵalym.
